ԵԱՏՄ անդամ երկրները, միջազգային իրավունքին համապատասխան, կարող են որոշում կայացնել ժամանակավորապես կասեցնելու Հայաստանի մասնակցությունը Միությանը՝ հաշվի առնելով Երևանի գործողություններից բխող ռիսկերը։
Այս մասին ասվում է ԵԱՏՄ Ռուսաստանի, Բելառուսի, Ղազախստանի և Ղրղզստանի միջկառավարական խորհրդի անդամների համատեղ զեկույցի մեջ՝ արված Հայաստանի նկատմամբ Եվրասիական տնտեսական միության մասին պայմանագրի գործողության կասեցման հնարավոր հետևանքների վերաբերյալ։
«Ըստ կանխատեսումային գնահատականների՝ ԵԱՏՄ-ին մասնակցության կասեցումը կհանգեցնի Հայաստանի Հանրապետության տնտեսական ցուցանիշների վատթարացմանը։ Հայաստանի համախառն ապրանքաշրջանառությունը ԵԱՏՄ անդամ պետությունների հետ կնվազի ավելի քան 55%-ով. Հայաստանից ԵԱՏՄ անդամ պետություններ ապրանքների արտահանումը կկրճատվի ավելի քան 65%-ով, իսկ ԵԱՏՄ անդամ պետություններից ապրանքների ներմուծումը՝ գրեթե կիսով չափ:
Հայաստանի Հանրապետության կողմից գազի ներկրումը արժեքային արտահայտությամբ կաճի 268,5 միլիոն դոլարով կամ 69%-ով՝ 389-ից հասնելով 657,5 միլիոն դոլարի»,- ասված է փաստաթղթում։
Պարզաբանվում է, որ ԵԱՏՄ անդամ պետություններից հանրապետության կողմից գազի ներկրման սցենարային գնահատումը ելնում է հազար խորանարդ մետրի դիմաց 300 դոլար գնից՝ մատակարարումների ֆիզիկական ծավալի պահպանման դեպքում։
«Հազար խորանարդ մետրի դիմաց 177,5 դոլար գործող բազային գնի համեմատ գնի աճը կկազմի շուրջ 69%»,- ավելացվում է զեկույցում։
