Ռուսաստանի և Թուրքիայի ԱԳ նախարարներ Սերգեյ Լավրովը և Հաքան Ֆիդանը քննարկել են առևտրատնտեսական և էներգետիկ համագործակցությունը՝ շեշտը դնելով առանցքային նախագծերի իրականացման ընթացքի վրա:
Այս մասին ասվում է ՌԴ դիվանագիտական գերատեսչության հաղորդագրության մեջ Բաքվում ընթացող Ասիայում փոխգործակցության և վստահության միջոցների հարցերով խորհրդաժողովի 7-րդ գագաթնաժողովի շրջանակներում նախարարների հանդիպման արդյունքներով, հաղորդում է ՏԱՍՍ-ը:
«Մտքեր են փոխանակվել առևտրատնտեսական և էներգետիկ համագործակցության ակտիվացման ընթացիկ խնդիրների շուրջ՝ շեշտը դնելով երկկողմ առանցքային նախագծերի իրականացման ընթացքի վրա»,- ասել են ԱԳՆ-ում:
«Դիտարկվել է բարձրագույն և բարձր մակարդակներում շփումների ժամանակացույցը»,- մատնանշել են Ռուսաստանի ԱԳՆ-ում:
Լավրովը և Ֆիդանը հաստատել են ուկրաինական ճգնաժամի արդարացի կարգավորմանն աջակցելու կարևորությունը:
«Հաստատվել է միջազգային ասպարեզում Ռուսաստանի և Թուրքիայի գործողությունների համակարգման կարևորությունը, ներառյալ Ուկրաինայի շուրջ ճգնաժամի արդարացի կարգավորման հասնելու աջակցությունը»,- ընդգծել են ԱԳՆ-ում:
