Կառավարության առաջարկով ընթանում է ԱԺ արտահերթ նիստը, որի օրակարգում երկու հարց է:
Առաջինը Կառավարության ներկայացրած՝ «Հայաստանի Հանրապետության կառավարության և Կենսաբանական բազմազանության մասին կոնվենցիայի քարտուղարության միջև կողմերի համաժողովի 17-րդ հանդիպման, որպես Կարթագենյան արձանագրության կողմերի հանդիպում հանդես եկող կողմերի համաժողովի 12-րդ հանդիպման և որպես Նագոյայի արձանագրության կողմերի հանդիպում հանդես եկող կողմերի համաժողովի 6-րդ հանդիպման անցկացման վերաբերյալ» համաձայնագիրը վավերացնելու մասին օրենքի նախագիծն է, որի քննարկումը հարթ չի ընթացել:
«Հայաստան» խմբակցության անունից ելույթով հանդես է եկել Մեսրոպ Մանուկյանը, նա հայտարարել է, թե ընդդիմությունը կոչ է անում չթալանել քաղաքացու հարկերը, չզբաղվել թալանչիությամբ:
Նա իշխանությանը մեղադրել է միջոցառումների անցկացման համար մասնավորին մեծ գումարներ տրամադրելու համար ու հավելել, թե «թալանչիությունը այդպես է լինում»:
ԱԺ նախագահ Ռուբեն Ռուբինյանը հորդորել է պատգամավորին մնալ կոռեկտության սահմաններում, ինչին նա արձագանքել է տեղից մի շարք արտահայտություններ նետելով:
«Ինչպես արդարացիորեն ասում է Եղոյանը, պարո՛ն Մանուկյան, իմ նախկին ղեկավարի մոտից չեն գտել զինվորների համար նախատեսված տուշոնկեք: Ամոթն էլ է լավ բան»,- ասել է Ռուբինյանը՝ դիմելով Մանուկյանին:
