Ուկրաինայի նախագահ Վլադիմիր Զելենսկին հայտարարել է, որ երկիրը կարող է նախագահական ընտրություններ անցկացնել, եթե Ռուսաստանը համաձայնվի 60-օրյա հրադադարի։ Այս հայտարարությունն արվել է կիրակի՝ հոկտեմբերի 11-ին, ABC-ի «Այս շաբաթ» հաղորդման ժամանակ։
«Խնդրում եմ, ասեք Պուտինին. տվեք մեզ երկու ամիս, 60 օր լիակատար հրադադարի համար։ 60 օր, և մենք կկազմակերպենք ընտրություններ», — ասել է Զելենսկին հաղորդավար Ջոնաթան Կառլի հետ զրույցում։ Նա նաև հավելել է, որ «նախագահ Թրամփի նկատմամբ ամբողջ հարգանքով», Ուկրաինայի քաղաքացիներն են, «ովքեր պետք է ընտրեն մեկ կամ մյուս առաջնորդին»։
Հարցին, թե ինչու են ԱՄՆ նախագահ Դոնալդ Թրամփը և ամերիկացի տեխնոլոգիական միլիարդատեր Իլոն Մասկը մեղադրում իրեն պատերազմը շարունակելու մեջ, Զելենսկին պատասխանել է, որ Վաշինգտոնը չի կարող «գտնել Ռուսաստանի նախագահ Վլադիմիր Պուտինին կանգնեցնելու բանալին»։
«Որովհետև Պուտինին կանգնեցնելն ավելի դժվար է, քան ուրիշներին ճնշելը։ Որովհետև ավելի հեշտ է խոսել գների մասին և դրանք կապել Ուկրաինայի հետ», — հավելել է նա։
Զելենսկիի հայտարարությունից առաջ՝ հոկտեմբերի 10-ին Թրամփը հայտարարել էր, որ Ուկրաինային նոր նախագահ գտնելու անհրաժեշտություն կա։
Միևնույն ժամանակ, Թրամփը նշել էր, որ Զելենսկին անտեսել է ԱՄՆ-ի խնդրանքները՝ դադարեցնելու ռուսական նավթավերամշակման գործարաններին հարվածները։
«Նա (Զելենսկին — խմբ.) ուզում է խնդիրներ ստեղծել աշխարհի համար: Նա ուզում է խնդիրներ ստեղծել մեր ֆերմերների համար դիզելային վառելիքի հետ կապված, քանի որ Ռուսաստանը մատակարարում է դիզելային վառելիքի զգալի մասը ամբողջ աշխարհում: Նա (Զելենսկին — խմբ.) ավելի լավ է դադարեցնի դա (նավթավերամշակման գործարանների վրա հարվածները — խմբ.)», — ասել էր Սպիտակ տան ղեկավարը:
