Գոհ եմ Սուրեն Պապիկյանի աշխատանքից, որովհետև ձեր իշխանության թողած «некондиционный» (ստանդարտներին չհամապատասխանող) բանակը, ըստ էության, սպառված զինատեսակներով բանակը հիմա այնպիսին է, ինչպիսին մենք տեսել ենք մայիսի 28-ին Հանրապետության հրապարակում: Այս մասին ԱԺ-ում հարցուպատասխանի ժամանակ հայտարարեց վարչապետ Նիկոլ Փաշինյանը՝ անդրադառնալով «Ուժեղ Հայաստան» խմբակցության պատգամավոր Անուշ Միրզոյանի հարցին:
Փաշինյանը հիշեցրեց, որ այժմ գոյություն ունի «Պաշտպան հայրենյաց» ծրագիրը, որով հազարավոր երիտասարդներ պայմանագրային ծառայություն են իրականացնում և ոչ միայն անվտանգային խնդիր են լուծում, այլև շատ լայն սոցիալական հարցեր են կարգավորվում:
«Ինչ վերաբերում է հարցի այն մասին, թե արդյոք մեր աշխատանքը կատարյալ է, ապա՝ ոչ, մեր աշխատանքը կատարյալ չէ: Մեր աշխատանքում կան բազմաթիվ բացեր և թերություններ և մենք շարունակաբար աշխատում ենք այդ բացերի ու թերությունների վրա՝ այդ թվում ամեն դեպքի համար տալով կոնկրետ լուծումներ: Ըստ էության, եթե ձեզ լսենք, մյուս խմբակցության ներկայացուցիչներին լսենք, որ ասաց. «Զենքերն առել եք, ինչի համար եք առել այդ զենքերը, երբ որ Շաքիում այդ դեպքը տեղի է ունենում», տրամաբանական բան է դառնում, այսինքն՝ եթե դուք լինեիք այդ զենքերը հանելու էիք և սկսելու էիք կիրառել: Հիմա ձեր հայտարարությունը այդ է, ինչ եք անում, երկու օր է ուղերձներով դիմում եք ժողովրդին և ռազմական դրություն եք հայտարարում: Այսօր ռազմական դրություն չեք հայտարարում միայն այն բանի պատճառով, որ այդ լիազորությունը չունեք»,-ասաց վարչապետը:
Անդրադառնալով ընդդիմադիր պատգամավորի դիտարկմանը, թե հուսով է, որ առաջիկայում նաև կլսեն վարչապետի հրաժարականի մասին, Փաշինյանը ասաց. «Նախկինում, երբ հրաժարական եմ տվել դա ոչ մի լավ բան չի նշանակել ընդդիմության համար: Այնպես որ, եթե դուք մի օր լսեք իմ հրաժարականի մասին, իմացեք, որ դուք այս դահլիճում չեք լինելու: Խորհուրդ կտայի առանձնապես այդ մտքով չոգևորվել»:
