Շիրակի մարզում Քեթիի նոր կրթահամալիրի հարակից 7-րդ փողոցի հիմնանորոգման աշխատանքներն ավարտական փուլում են։ Այս մասին հայտնում է Ախուրյանի համայնքապետարանը։
Շուրջ կես կիլոմետր երկարությամբ ճանապարհի հիմնանորոգման աշխատանքների ընթացքում կատարված փոխատեղման արդյունքում ճանապարհի երկարությունն ավելացվել է ևս 90 մետրով։
Ծրագրի ընդհանուր արժեքը կազմում է 95 միլիոն դրամ։
Ճանապարհաշինական աշխատանքներին զուգահեռ կառուցվում են նաև դպրոցի հարակից ավտոկայանատեղին, ջրահեռացման համակարգը և միակողմանի մայթերը։
Ճանապարհաշինությունն իրականացվում է ՀՀ կառավարության հրատապ ծրագրով՝ նպատակ ունենալով կրթահամալիրի հարակից տարածքը դարձնել բարեկարգ, անվտանգ և դպրոցին համապատասխան։
Այսպիսով՝ երեխաների համար ապահովվում է դեպի դպրոց տանող մաքուր, հարմարավետ և անվտանգ ճանապարհ։
