«Այսօր ես հայտարարում եմ երբևէ որևէ երկրի դեմ ձեռնարկված ամենակործարար տնտեսական գործողության մասին»:
Այս մասին Truth Social-ի իր էջում գրել է ԱՄՆ նախագահ Դոնալդ Թրամփը:
«Որևէ մեկը Իրանի Իսլամական Հանրապետությանը գործարք կնքելու ավելի մեծ հնարավորություն չի տվել, քան ես: Ցավոք սրտի, նրանք չկարողացան օգտվել դրանից: Հետևաբար այսօր ես հայտարարում եմ երբևէ որևէ երկրի դեմ ձեռնարկված ամենակործարար տնտեսական գործողության մասին: Սա լինելու է աննախադեպ մասշտաբի տնտեսական պատերազմ և մեկուսացում»,- գրել է ԱՄՆ նախագահը:
Թրամփը զգուշացրել է, որ ցանկացած երկիր, որը ինչ-որ ձևով կօգնի Իրանին, կբախվի հսկայական տնտեսական հետևանքների:
«Նրանց նավատորմը չկա, նրանց ռազմական օդուժը ոչնչացված է, նրանց ռազմական գործարաններն այժմ փլատակներ են, նրանց արժույթն անարժեք է, և նրանց երկիրը կախված է մազից: Այսօր ես նաև հայտարարում եմ, որ ցանկացած երկիր, որը թույլ կտա իր ֆինանսական հաստատություններին, ձեռնարկություններին, օդանավակայաններին կամ պետական մարմիններին որևէ տեսակի փրկօղակ տրամադրել Իրանին, ինքը կբախվի հսկայական տնտեսական հետևանքների:
Սա լինելու է տնտեսական օր, և մենք պահանջում ենք, որ մեր բոլոր դաշնակիցները կանգնեն Ամերիկայի Միացյալ Նահանգների կողքին՝ մեկուսացնելու և պարտության մատնելու համար Իրանի սպառնալիքը: Այս մոլագարները հայտնվել են անելանելի վիճակում, և այս պատմական միջոցառումները կկաթվածահարեն նրանց և համաշխարհային մասշտաբով ահաբեկչություն տարածելու նրանց կարողությունը: Իրանը երբեք միջուկային զենք չի ունենալու»,- եզրափակել է Թրամփը:
