Ազգային ժողովում իրավիճակը լարվեց. «Ուժեղ Հայաստան» խմբակցության պատգամավոր Արեգա Հովսեփյանի եզրափակիչ ելույթից հետո ԱԺ փոխնախագահ Վահագն Ալեքսանյանը փորձեց նկատառում անել, ինչին միջամտեց ՈՒՀ-ի պատգամավոր Տիգրան Աբրահամյանը:
Վահագն Ալեքսանյանը նիստը վարողի իրավունքով նրան հայտարարեց նախազգուշացում: Տեղից արձագանքեց ՈՒՀ-ի պատգամավոր Դավիթ Ղազինյանը:
Վահագն Ալեքսանյանը արձագանքեց՝ ասելով. «Դավի՛թ Ղազինյան, Ձեզ ևս հայտարարվում է նախազգուշացում»:
Ղազինյանն ասաց, թե իրենք էլ Ալեքսանյանին են հայտարարում նախազգուշացում, Ալեքսանյանն էլ ասաց. «Դուք չեք կարող ինձ հայտարարել նախազգուշացում»:
Այնուհետև Վահագն Ալեքսանյանը հայտարարեց. «Պատգամավոր Դավիթ Ղազինյանի նկատմամբ կիրառվում է կարգապահական տույժ՝ մեկ նիստում խոսափողից հանդես գալու իրավունքից զրկում: Ձեզ պահեք կարգ ու կանոնով»:
Այնուհետև ԱԺ փոխնախագահը հայտարարեց, որ պատգամավոր Դավիթ Ղազինյանի նկատմամբ կիրառվում է կարգապահական պատասխանատվություն՝ հեռացում մինչև տվյալ օրվա ավարտը կայանալիք նիստերից՝ զրկելով այդ ընթացքում դահլիճում ներկա գտնվելու իրավունքից»:
Վահագն Ալեքսանյանը Դավիթ Ղազինյանից պահանջեց դուրս գալ դալիճից: Տեսնելով, որ Ղազինյանը չի ենթարկվում պահանջին՝ Ալեքսանյանը հրավիրեց անվտանգության աշխատակիցներին:
«Ես խնդրում եմ, որ անվտանգության աշխատակիցները մոտնենան և դուրս հանեն պատգամավոր Դավիթ Ղազինյանին»,- ասաց նա:
Անվտանգության աշխատակիցները մոտեցան, սակայն Ղազինյանը ինքնակամ լքեց դալիճը: Նրա հետ դահլիճը լքեցին «Ուժեղ Հայաստան» խմբակցության բոլոր պատգամավորները:
