Վերջին երկու շաբաթների ընթացքում ՆԳՆ 112 օպերատիվ կառավարման կենտրոն ահազանգեր են ստացվել, որ հանրապետության տարբեր եկեղեցիներից ու մատուռներից գողություններ են կատարվում։
Հափշտակվել են խաչեր, գավաթներ, մյուռամաններ և եկեղեցական այլ պարագաներ։
Համայնքային ոստիկանության Աշտարակի բաժնում ստացված օպերատիվ տեղեկությունն իրացվել է Համայնքային ոստիկանության գլխավոր վարչության, ինչպես նաև Արտաշատի, Արարատի, Արմավիրի բաժինների և պարեկների հետ։
Ձեռնարկած օպերատիվ հետախուզական միջոցառումների արդյունքում պարզվել է, որ եկեղեցիներից ու մատուռներից գողությունները կատարում են Արմավիր քաղաքի 30 և 38-ամյա տղամարդիկ։
Օգոստոսի 14-ին՝ ժամը 16:50-ի սահմաններում, Երևան-Երասխ ճանապարհի Շահումյան գյուղի հատվածում նրանք հայտնաբերվել են, գողություն կատարելու անմիջականորեն ծագած կասկածով ձերբակալվել և «Նիսան» մակնիշի մեքենայով հանդերձ տեղափոխվել Արտաշատի բաժին, իսկ մեքենան՝ պահպանվող հատուկ տարածք։
Պարզվել է նաև, որ տղամարդիկ հասցրել են գողոնի մի մասը վաճառել։ Գողոնի մնացած մասը հայտնաբերվել է մեքենայի ակնհայտ տեսանելի հատվածում։
«Կազմված փաստաթղթերը ներկայացվել են նախաքննական մարմին։ Հանգամանքները պարզվում են»,- ասվում է ՆԳՆ-ի հաղորդագրության մեջ:
