«Լսում ես, որ տաքսու վարորդները բողոքում են, ասում են՝ մեզ էլ ներգրավեք առողջության ապահովագրության համակարգ, սրանից ավելի լավ գնահատական գոյություն չունի»,-Կառավարության նիստում ասաց վարչապետ Նիկոլ Փաշինյանը:
Փաշինյանը հիշեցրեց, որ շրջել են Հանրապետության բոլոր մարզերով և Երևանով. «Ուզում եմ ասել հետևյալը՝ մենք չենք ունեցել որևէ բարեփոխում, որ այսքան արագ և այսքան ծավալով արձագանք ունենա: Մենք ստացել ենք մի վիճակ, երբ առողջական պրոբլեմ ունեցող մարդու մահճակալի կողքին՝ հարազատի կարգավիճակով, նստած է իր պետությունը, սա բացառիկ դեպք է: Առողջության ապահովագրության համակարգն այդ աթոռը դրել է, կամ երկրորդ աթոռն է դրել առողջական խնդիր ունեցող մարդու կողքին և այդ աթոռին նստած է ՀՀ-ն: Մենք այս բարեփոխումը պետք է փայփայենք, ամենօրյա խնամք տանենք բարեփոխման նկատմամբ, որպեսզի ինքը զարգանա»:
Վարչապետը նաև ներկայացրեց թվային տվյալներ. «Մենք արդեն 2 միլիոն 277 հազար 479 այց ենք ունեցել, հիվանդանոցային այցերի թիվը 105 հազար 670 է: 65+ տարիքի թոշակառուների թիվը 221 հազար 361 է: ՀՀ պետական բյուջեն ծախսել է 28 միլիարդ 438 միլիոն միայն 65+ անձանց համար: Հունվարի 1-ից մինչև մարտի 31-ը 361 թոշակառու օգտվել է 4 միլիոն պլյուս արժեք ունեցող առողջապահական ծառայություններից»:
