ՀՀ վարչապետ Նիկոլ Փաշինյանի համոզմամբ, երբ մարդն ասում է, որ ինքը Վանից է, դա ոչ թե հայրենասիրական մոտեցում է, այլ՝ կայսերական հայրենասիրության դրսևորում։
«Չեմ վարանի ասել՝ դա ստալինյան հայրենասիրության դրսևորում է»,- կառավարության նիստում ասել է ՀՀ վարչապետը՝ հավելելով, որ չի ընդունում, երբ ասում են, թե 2020 թվականից առաջ Հայաստանը խաղաղություն է ունեցել։
ՀՀ վարչապետը նշել է, որ Հայաստանն ունեցել է սառեցված պատերազմ, ունեցել է պատերազմի հետաձգում ՀՀ ինքնիշխանության, անկախության, ազատության ու զարգացման հաշվին:
«Մենք հիմա Հայաստանի նավը հասցրել ենք խաղաղության հանգրվանի, ուղղակի նավի ուղևորներին պետք է խաղաղվել, իսկ խաղաղվել նշանակում է տնավորվել, բոխչաները քանդել ու դասավորել պահարաններում։
Այսինքն՝ անցնել մշտական բնակության ռեժիմի, հակառակ դեպքում, երբ մեր տարածաշրջանում վերադարձի թափանիվը պտտեցինք՝ տարածաշրջանից «մեծ կտորն ականջն է մնալու» ու դրա մեջ գիտենք, թե ամենաշատն ով է տուժողը լինում»,- հայտարարել է Փաշինյանը։
Ըստ նրա՝ ՀՀ այսօրվա ունեցածը մեծ պատմական ձեռքբերում է, որի մասին կխոսի մեկ ամիս հետո։
«Դա չի կարելի զոհել գերտերությունների շահերին»,- հավելել է Նիկոլ Փաշինյանը։
