Հայրենասիրության այն մոդելը, որով մենք, ես ինքս մինչև վերջերս ապրում էինք, այդ հայրենասիրության մոդելը մեզ համար Խորհրդային Միության Կոմունիստական կուսակցությունն են ստեղծել և Իոսիֆ Ստալինը: Ասել է՝ հա՛յ ժողովուրդ, պետք է այսպիսին լինեք: Այդ մասին Ազգային ժողով-Կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը՝ ընդգծելով, որ ժողովուրդն այժմ վերադառնում է իր ինքնությանը, որը կապվում է պետության հետ:
«Մենք հրաժարվում ենք Ստալինի սապոգի հայրենասիրության մոդելից: Սա մենք պետք է պարզ հասկանանք, սրա մասին է խոսքը: Մեր ինքնությունը մեր պետությունն է»,- ասաց նա:
«Քաղաքացիական պայմանագիր» խմբակցության պատգամավոր Մարիա Կարապետյանն անդրադարձավ քննարկումներին, թե խաղաղությունն ուրացում է, այն հայ ժողովրդի զոհողությունն է, միաժամանակ հիշեցրեց Նիկոլ Փաշինյանի այն հայտարարությունը, թե խաղաղությունը հատուցումն է ժողովրդի տված զոհողությունների:
Արձագանքելով պատգամավորի դիտարկմանը՝ Փաշինյանը հայտարարեց. «Հայ ժողովուրդը (էլի գիտեմ՝ դժվար է ընկալվելու), մենք գիտակցված զոհողության գնացել ենք 2020 թվականին: Դրա համար է, որ դրա արդյունքում ձեռք ենք բերել պետություն և անկախություն:
Սրանից առաջ այդ բոլոր զոհողությունների հեղինակը մենք չենք եղել: Մեզ տարել են կառափնարան և զոհել են իրենց շահերին:
Առաջին անգամ մենք զոհողության ենք գնացել մեր շահերի համար, հասկանո՞ւմ եք, մեր պետության, մեր ինքնության համար, մեր ապագայի համար, և սա է նյարդայնացնում բոլորին, որովհետև բոլորին նյարդայնացնում է, թե դուք ո՞վ եք, որ որոշեք: Մենք պետություն ենք: Մենք ՀՀ-ն ենք և մենք որոշել ենք: Ինչո՞ւ ենք որոշել, որովհետև ի տարբերություն ոմանց, ունեցել ենք մեր ժողովրդի տված լեգիտիմությունը: Այ դրա համար ենք որոշել: Մենք քվեատուփեր լցնելով չէ որ եկել, հասել ենք իշխանության, ոչ էլ այստեղից-այնտեղից դաբրոներ ունենալով ենք եկել հասել իշխանության:
2018-ի հեղափոխությունը տեղի է ունեցել ի հեճուկս բոլորին, որովհետև բոլորին ձեռք էր տալիս ՀՀ-ն ունենալ հորթի կարգավիճակում, որի վզից, պարանը գցած, որտեղ ուզում տանում են: Երաշխավորն այն է, որ պարանը գցել է հորթի վիզը և երաշխավորում է, որ ինքը նույնիսկ իրավունք չունի, թե երբ զոհողության գնա, որովհետև ինքը իրավունք չունի իր համար զոհողութան գնալ: Ինքը կարող է զոհողության գնալ երաշխավորի համար, երբ երաշխավորն ասի՝ եկել է քո մորթվելու ժամանակը, գնա, մորթվի՛ր: Բոլորին սա է նյարդայնացնում»,- ասաց նա:
