Սահմանամերձ բնակավայրերում տուն կառուցելու՝ 16 միլիոնի ծրագրով նոր քվոտա ենք սահմանելու, բայց ոչ միայն սահմանամերձ բնակավայրերում: Այդ մասին ՀՀ ԱՍՀ նախարար Արսեն Թորոսյանի հետ հանդիպման ժամանակ ասաց վարչապետ Նիկոլ Փաշինյանը:
Նախարար Թորոսյանը տեղեկացրեց, որ քվոտան սահմանվելու է 3 խումբ շահառուների համար: Առաջին խմբում մոտ 400 շահառուներ են, որոնք նախկինում չեն հասցրել օգտվել ծրագրերից: Դրանք այն քաղաքացիներն են, որոնք բավարարում են ծրագրի բոլոր պարամետրերը, շինթույլտվությունը ստացել են մինչև 2025 թվականի մայիսի 1-ը, բայց չեն կարողացել դիմել և բանկից վարկ ստանալ: Դրանք նաև այն քաղաքացիներն են, որոնք 2024-ի հունվարի 1-ից մինչև 2025-ի մայիսի 1-ը հողամաս են ձեռք բերել, բայց միայն հողամասի սեփականության իրավունքներն են գրանցել:
«Այս քաղաքացիների համար քվոտան գործելու է ուղիղ այն համայնքում, որտեղ շինթույլտվությունը ստացել են, հողամասը ձեռք են բերել, այսինքն՝ որևէ սահմանափակում չկա»,- ասաց նախարարը:
Վարչապետ Նիկոլ Փաշինյանը պարզաբանեց՝ խոսքն այն քաղաքացիների մասին է, որոնք շինթույլտվությունը մայիսի 1-ի դրությամբ արդեն ստացած են եղել:
ԱՍՀՆ-ն նաև որոշել է, որ քվոտաներ կսահմանվեն այն բնակավայրերում, որտեղ բնակչության թվի համամասնությամբ 10 տոկոսից ավելի տուն է կառուցվել: Նոր քվոտա կսահմանվի այն բնակավայրերում, որտեղ 10 տոկոսից քիչ տուն է կառուցվել:
«Նոր քվոտաներից կարող են օգտվել այն քաղաքացիները կամ այն ընտանիքները, որտեղ ամուսիններից մեկը (կամ եթե միայնակ մայր է) ունի առնվազն 1 տարվա հաշվառում այդ համայնքում… Կա՛մ պետք է լինի ընտանիքում անչափահաս երեխա, կա՛մ ամուսինների հանրագումարային տարիքը չպետք է գերազանցի 75 տարեկանը»,- ասաց նա:
Եվս մեկ քվոտա է սահմանվել, ըստ որի՝ եթե որևէ բնակավայրում դպրոցում տեղերը 50 տոկոսից պակաս է լրացված, ապա այդ 50 տոկոսի 20 տոկոսի չափով քվոտաներ կսահմանվեն: Այս դեպքում խոսքը 243 քվոտայի մասին է:
«Այստեղ սահմանափակում կա ուղիղ այն տրամաբանությամբ, թե ինչու ենք տալիս այս քվոտան, որպեսզի երեխաների թիվը լրանա դպրոցում, և նաև երեխաները որակյալ կրթություն ստանան նորակառույց դպրոցներում: Պարտադիր պայման է, որ երեխայի տարիքը լինի 10 տարեկանից ցածր՝ շահառու դառնալու համար, որովհետև շահառու դառնալը և նախագծելը, կառուցելը տևում է միջինացված մոտ 2-3 տարի, ուստի կարևոր է, որ երեխաները, որոնք այդ դպրոցի պոտենցիալ աշակերտը պետք է դառնան, սովորեն այդ դպրոցում, դրա համար ավելի ցածր տարիք ենք վերցրել, քան, օրինակ, Գոմքի պիլոտային ծրագրի դեպքում էր, որի դեպքում 13 տարեկան էր սահմանված»,- ասաց նա:
Նաև զեկուցվեց, որ ավարտական ակտ ունեցող տների թիվն այս պահին 272 է, իսկ առհասարակ ՀՀ տարբեր բնակավայրերում պետբյուջեի միջոցների հաշվին ընդհանուր 3700 տուն է կառուցվում այս ծրագրով:
