«Իմ քայլը» բարեգործական հիմնադրամի գործադիր տնօրեն, ՀՀ վարչապետ Նիկոլ Փաշինյանի նախկին կին Աննա Հակոբյանը վերջին վեց օրվա ընթացքում մասնակցել է երեք բազմամարդ միջոցառման։ Այս մասին հայտնել է հիմնադրամը՝ ներկայացնելով, թե լրատվական դաշտում այդ միջոցառումներն ինչպիսի արձագանքներ են ունեցել։
Հայտարարությունն ամբողջությամբ՝ ստորև․
«Մարտի 8-ին նա ներկա է գտնվել «Դվին» Մյուզիք-հոլում կայացած Լյուբով Ուսպենսկայայի համերգին, մարտի 10-ին մասնակցել է անմահացած հերոսներ Ռուբեն և Արմեն Շահինյանների նորածին եղբոր մկրտության արարողությանն ու դրան հաջորդած խնջույքին, իսկ մարտի 12-ին` «Կրթվելը նորաձև է» շարժման հերթական բանախոսությանը Մատենադարանում, որի հյուրն էր ԱՄՆ-ից Հայաստան ժամանած ականավոր տնտեսագետ և ներդրումային խորհրդատու Մարք Չէնեանը։
Ինչպես են այս «սենսացիոն» նյութերը մատուցել ՀՀ լրատվամիջոցները․
1. «Դվին»-ում կայացած համերգի մասնակցության մասին (լուսանկար 1) — 0 արտահոսք և 0 լրատվություն, չնայած այն հանգամանքին, որ միջոցառմանը ներկա է եղել մոտ 1000 մարդ, և բոլորն իմացել են Աննա Հակոբյանի այնտեղ գտնվելու մասին։
2. Մկրտության և հաջորդող խնջույքին մասնակցության մասին (լուսանկար 2) — տասնյակ հրեշավոր նյութեր, կեղծիքներ, ինտրիգներ, բամբասանքներ:
3. Բանախոսության և դրան ներկա գտնվելու մասին (լուսանկար 3) — մինչ այս պահը՝ 0 լուսաբանում, չնայած այն հանգամանքին, որ հիմնադրամի պաշտոնական էլեկտրոնային հասցեից, ինչպես միշտ, պատշաճ կերպով տարածվել է տեղեկատվությունը կայացած միջոցառման վերաբերյալ։
Վերը բերված պատկերը առաջացնում է խորը հիասթափություն և տրտմություն: Կոչ ենք անում հայաստանյան բոլոր լրատվամիջոցներին և լրագրողներին վերհիշել` որն է լրագրողի մասնագիտական կոչումն ու առաքելությունը և փորձել կրել դրանք։
Ակնկալում ենք, որ այսուհետ հայաստանյան լրատվամիջոցները առավել ակտիվորեն կլուսաբանեն «Իմ քայլը» հիմնադրամի` տիկին Աննա Հակոբյանի գլխավորությամբ իրականացվող լայնածավալ գործունեությունը, ինչի արդյունքում հանրային դաշտում ոչ ժամանակ, և ոչ էլ տարածք կմնա կեղծիքների, բամբասանքների և ինտրիգների համար։
