ԱՄՆ նախագահ Դոնալդ Թրամփը հայտարարել է նավթի մատակարարման հետ կապված որոշակի երկրների նկատմամբ պատժամիջոցները վերացնելու իր որոշման մասին՝ գները վերահսկելու նպատակով։
«Մենք վերացնում ենք նավթի հետ կապված մի շարք պատժամիջոցներ՝ գները իջեցնելու համար։ Մենք պատժամիջոցներ ունենք որոշակի երկրների նկատմամբ, և մենք շարունակելու ենք դրանք վերացնել մինչև իրավիճակը բարելավվի», — ասել է Թրամփը։
Նա չի մանրամասնել, թե որ երկրներին կատի ունի։ Սպիտակ տան ղեկավարը չի բացառել այն հնարավորությունը, որ ԱՄՆ-ն կարող է չվերականգնել այս պատժամիջոցները։ Նա նաև նավթի գների աճը անվանել է արհեստական։
Մի շարք լրատվամիջոցներ հայտնել են, որ որոշումը վերաբերում է նաև ՌԴ-ին, որի նկատմամբ դեռ Բայդենի օրոք պատժամիջոցներ էին սահմանվել:
Թրամփը նման որոշում է կայացրել Ռուսաստանի նախագահ Վլադիմիր Պուտինի հետ հեռախոսազրույցից հետո, զրույցը որակել է որպես լավ՝ նշելով, որ Ուկրաինայի վերաբերյալ երկխոսությունը դրական է եղել։ Նա նաև նշել է Ռուսաստանի առաջնորդի ցանկությունը՝ նպաստել Մերձավոր Արևելքում հակամարտության կարգավորմանը։
Մարտի 9-ի երեկոյան Ռուսաստանի նախագահի օգնական Յուրի Ուշակովը հայտնել է, որ Վլադիմիր Պուտինը իր ամերիկացի գործընկերոջ հետ քննարկել է Մերձավոր Արևելքում տիրող իրավիճակը, Ուկրաինայում խաղաղության գործընթացը և Վենեսուելան: Պետության ղեկավարը կոչ է արել քաղաքական և դիվանագիտական ճանապարհով լուծել Վաշինգտոնի և Թեհրանի միջև առկա տարաձայնությունները և գովաբանել է ԱՄՆ միջնորդական ջանքերը Ուկրաինայում հակամարտությունը կարգավորելու համար: Զրույցը տեղի է ունեցել ամերիկյան կողմի նախաձեռնությամբ։
Նավթի համաշխարհային գները երկուշաբթի օրը բարձրացել են 119 դոլարից բարձր՝ 2022 թվականի հունիսի 17-ից ի վեր առաջին անգամ, Մերձավոր Արևելքում հակամարտության ֆոնին: Ամերիկացի առաջնորդի կողմից Իրանում գործողությունը շուտով ավարտելու մասին հայտարարությունից հետո նավթի գինը շտկվել է մինչև 90 դոլար։
Նախորդ օրը Reuters-ը, հղում անելով անանուն աղբյուրներին, հայտնել է, որ Թրամփի վարչակազմը քննարկում է նավթի ոլորտում Ռուսաստանի դեմ պատժամիջոցների հետագա մեղմացումը՝ վառելիքի գների աճի ֆոնին։
