Մերձավոր Արևելքում իրավիճակով պայմանավորված Քուվեյթում Հայաստանի Հանրապետության դեսպանությունը (համատեղությամբ՝ Հորդանան) ևս աշխատում է առավել ինտենսիվ ռեժիմով, հայտնում են ԱԳ նախարարության մամուլի ծառայությունից։
«Փետրվարի 28-ին «Jazeera Airways» ավիաընկերության Քուվեյթ-Երևան չվերթը չեղարկվել է, Քուվեյթում մնացած ուղևորներից 19-ը ՀՀ քաղաքացի են:
Այս պահին Քուվեյթի օդանավակայանը փակ է՝ երկրի քաղաքացիական ավիացիայի ծառայության հրահանգի հիման վրա: Քուվեյթի իշխանություններն, ընդառաջելով ՀՀ դեսպանության խնդրանքին, ՀՀ քաղաքացիներին մուտքի արտոնագրեր են տրամադրել, իսկ Jazeera Airways ավիաընկերությունը հոգ է տարել չվերթի բոլոր ուղևորներին՝ տեղավորելով հյուրանոցում և հոգալով սննդի հետ կապված ծախսերը:
Քուվեյթում մնացած ՀՀ քաղաքացիները մշտապես կապի մեջ են ՀՀ դեսպանության հետ:
ՀՀ դեսպանության թեժ գծին ստացվում են իրավիճակով պայմանավորված հարցերով զանգեր, քաղաքացիներին տրվում են համապատասխան աջակցություն և ուղղորդումներ՝ ըստ անհրաժեշտության։
Հյուպատոսական ծառայությունները մատուցվում են բնականոն ռեժիմով»,-նշվում է հաղորդագրության մեջ։
