Ազգային ժողովի «Քաղաքացիական պայմանագիր» խմբակցության պատգամավոր Անդրանիկ Քոչարյանի խոսքով՝ թեպետ ամբողջ տարածաշրջանում հրթիռակոծություններ են, սակայն Հայաստանում այս պահին վտանգ չկա: Քոչարյանը վստահեցնում է, որ մեր պետական կառույցները աշխատում են:
Պատգամավորը նաև հավաստիացնում է՝ հայ-իրանական հարաբերությունները մշտապես գտնվում են ամենաբարձր մակարդակի վրա:
«Վա՞տ է, որ ամեն տեղ տարածաշրջանում հրթիռները թափառում են՝ բացի Հայաստանից, դա ինչի՞ արդյունքն է՝ խաղաղության»,- ասում է նա:
Անդրադառնալով ընդդիմությանը՝ իշխող ուժի անդամը նկատում է. «Ռոբերտ Քոչարյանը բոլոր դժվարին պահերին փորձում է հարցերը էլ ավելի սրված ներկայացնել: Նա ավելի լավ է պատասխանի հարցին, թե երկաթգիծը ինչու քանդեց: Քոչարյանը փորձում է իր ունեցվածքը փրկել: Դաշնակցությունը վերջապես ե՞րբ է հստակեցնելու իր և Քոչարյանի հարաբերությունները. Քոչարյանը դաշնա՞կ է, թե՞ չէ»:
Ինչ վերաբերում է Սամվել Կարապետյանին, Անդրանիկ Քոչարյանն ասում է. «Նա հասարակությանը հայտնի է որպես խոշոր օլիգարխ, քաղաքական հետագիծ չունի և չի կարող լինել պատգամավոր»:
Քոչարյանը միաժամանակ շեշտում է՝ «Քաղաքացիական պայմանագրի» ոչ մի պատգամավոր չի դավաճանի և միանա իմպիչմենտի գործընթացին:
Ըստ իշխող ուժի անդամի՝ ընտրություններին մեր ժողովուրդը պետք է որոշի՝ իշխանության տերն ի՞նքն է, թե՞ խարդավանքների միջոցով իշխանությունը կփոխանցվի 3-րդ կողմին:
Առավել մանրամասն՝ «Հայկական ժամանակ»-ի հետ հարցազրույցում:
