«Երբ անկանխիկի առևտրի վերլուծությունը ստացել ենք, տեսել եմ, որ ծխախոտի ծախսը թոշակառուների շրջանում շատ մեծ է, դրանից շատ եմ նեղվել»:
Այս մասին ԱՍՀ նախարար Արսեն Թորոսյանի հետ կենսաթոշակների բարձրացման հարցի քննարկման ժամանակ ասել է վարչապետ Նիկոլ Փաշինյանը:
«Ամենայն հարգանքով, ես էլ եմ ծխել, հայրս էլ է ծխել, մինչև վերջ էլ ծխում էր, ինչը հիվանդության զարգացման պատճառներից էր։ Ես ոչինչ չէի կարողանում անել, որ չծխի:
Ասում էի՝ լավ, հիմա 10 հազար դրամ պետք է ավելացնենք, որ միջին սպառողական զամբյուղի խնդիրը լուծենք, 10 հազարը տանք, մեր սիրելի թոշակառուները գնան ծխախոտ առնեն և ծխախոտի օգտագործման արդյունքում առողջական խնդիր ունենան, դրա համար էլ մտածեցինք ու ասացինք, որ եկեք այս փուլում այդ 10 հազար դրամը ուղղորդենք առողջության վրա:
Մենք ճիշտ ենք վարվել, հետո արձանագրեցինք, որ 2025 թվականի տնտեսական աճը եղել է 7,2 տոկոս, հաջորդ օրը ֆինանսների նախարարին ու փոխվարչապետներին գրել եմ ու հարցրել, որ այդ աճին դրամական գնահատական տան, ասացին՝ դա 100 մլրդ դրամ է, ես էլ ասացի, որ հիմա 10 հազար դրամով կավելացնենք թոշակը: Սա այն դեպքն է, որ մեր թոշակառուները պետք է զգան տնտեսական աճը»,- նշել է նա:
