Իրանական անօդաչու թռչող սարքերը թիրախավորել են Կատարի էներգետիկ ենթակառուցվածքները։
Այս մասին հայտնել է Կատարի պաշտպանության նախարարությունը՝ նշելով, որ երկու իրանական անօդաչու թռչող սարք հարձակվել է երկրի էներգետիկ օբյեկտների վրա, որոնցից մեկը պատկանում է Qatar Energy նավթագազային ընկերությանը։
Զոհերի մասին տեղեկություններ չկան։
«Վնասները կգնահատվեն, որից հետո կարվեն պաշտոնական հայտարարություններ»,- նշել է Պաշտպանության նախարարությունը։
Ավելի վաղ հայտնել էինք, որ Իրանը հարվածել էր Քուվեյթում ԱՄՆ դեսպանատանը:
Հիշեցնենք՝ Միացյալ Նահանգներն ու Իսրայելը հարվածել են Իրանին: Թեհրանը պատասխան հրթիռային հարվածներ է հասցրել Մերձավոր Արևելքում գտնվող ամերիկյան ռազմական օբյեկտներին: Գործողությունը տեղի է ունեցել Իրանի միջուկային ծրագրի շուրջ բանակցությունների ձախողման ֆոնին։
Իսրայելա-ամերիկյան հարձակման հետևանքով սպանվել են Իրանի գերագույն առաջնորդ Ալի Խամենեին և բարձրաստիճան այլ պաշտոնյաներ։ Երկրում 40-օրյա սուգ է հայտարարվել:
Իրանի փոխնախագահը հայտնել է, որ Գերագույն առաջնորդի պարտականությունները ժամանակավորապես կկատարեն նախագահը, դատական իշխանության ղեկավարը և Սահմանադրության պահապանների խորհրդի անդամներից մեկը:
Իսլամական հեղափոխության պահապանների կորպուսը հայտարարել է «ամենակատաղի հարձակողական գործողության» մեկնարկի մասին. ԱՄՆ նախագահը նախազգուշացրել է Իրանին՝ զերծ մնալ պատասխան հարվածներից:
Մերձավորարևելյան լարվածության ֆոնին Հայաստանի ԱԳՆ-ից հայտնել են, որ առկա տվյալներով՝ զոհերի շրջանում ՀՀ քաղաքացիների լինելու վերաբերյալ տեղեկություններ չկան:
