Մեծ տառերով գրված «խաղաղություն» բառի ֆոնին Ադրբեջանի նախագահն ու Հայաստանի վարչապետը ձեռք են սեղմում։ Այն, ինչը կարող է թվալ պարզ զուգադիպություն, խորը խորհրդանշական իմաստ ունի։
Այս մասին X-ի իր միկրոբլոգում գրել է Ադրբեջանի նախագահի օգնական և նախագահի աշխատակազմի արտաքին քաղաքականության վարչության պետ Հիքմեթ Հաջիևը։
«Նախագահ Դոնալդ Թրամփը, որպես Խաղաղության խորհրդի հիմնադիր նախագահ, ևս մեկ անգամ ընդգծել է Ադրբեջանի և Հայաստանի միջև խաղաղության հաստատման հետ կապված օրակարգի կարևորությունը»,- գրել է նա։
Ավելի վաղ հայտնել էինք, որ Վաշինգտոնում ընթացող «Խաղաղության խորհրդի» անդրանիկ նիստում ԱՄՆ նախագահ Դոնալդ Թրամփն անդրադարձել էր Հայաստան-Ադրբեջան հակամարտության դադարեցմանը և խաղաղության հաստատմանը։ Թրամփի հորդորով Նիկոլ Փաշինյանն ու Ալիևը ձեռքսեղմում էին ունեցել։
