«Թրիփփի մասով հետևյալ ժամանակացույցով ենք առաջնորդվելու՝ առաջիկա օրերին ԱՄՆ գործընկերներին կփոխանցնեք Թրիփփի հետ կապված համաձայնագրի նախագծի հետ կապված մեր դիտարկումները, որը հիմնված է լինելու երկու երկրների կառավարությունների հաստատած իրագործման շրջանակի վրա, որն էլ հիմնված է օգոստոսի 8-ի հռչակագրի վրա: Սկսվել է Թրիփփի նախագծի տեխնկատնտեսական ուսումնասիրությունը և գնահատումը», -ԱԺ-կառավարություն հարցուպատասխանի ժամանակ այս մասին ասաց վարչապետ Նիկոլ Փաշինյանը:
Նա խոսեց նաև ՀՀ-ԱՄՆ հարաբերությունների զարգացման այլ հեռանկարների մասին.«Էներգետիկայի ոլորտում մենք կտեսնենք՝ ինչպես ենք շարունակում մեր համագործակցությանը միջուկային էներգետիկայի ոլորտում: Այստեղ մի քանի գործընկերների հետ ունենք երկխոսություն և պիտի որոշում կայացնենք այն նախագծի օգտին, որն առավելագույնս համապատասխանում է մեր շահերին»:
Վարչապետի խոսքով՝ ամբողջ ծավալով ընթանում է Հրազդանում «Ֆայրբըրդ» ընկերության նախագիծը՝ արհեստական բանականության կենտրոնի ստեղծումը, և ԱՄՆ փոխնախագահն էլ հայտնել է, որ այդտեղ պոտենիցալ են տեսնում, որ ներդրումների ծավալը կարող է հասնել 4 միլիարդ դոլարի:
Ըստ վարչապետի, հաջորդ խնդիրը կապված է սահմանների կառավարման հետ.«Կառավարությանը խնդիր եմ առաջադրել՝ այն պահից, երբ սկսեն գործել բիոմետրիկ անձնագրերը, իսկ դա դա մենք սպասում ենք 2027-ի աշնանը, մեր օդանավակայանում և բոլոր կետերում պետք է գործեն անկոնտակտ անցման ուղիներ: Դրա համար պետք է, որ ԱՄՆ-ն, որ տիրապետում է այդ տեխնոլոգիաներին, դրանք կիսի մեզ հետ: Երեկ ԱՄՆ փոխնախագահի հետ քննարկել եմ այս թեմա և ստացել եմ հավաստիացում, որ այդ տեխնոլոգիաներով կկիսվեն ՀՀ-ի հետ»:
