Փետրվարի 6-ին մահափորձի ենթարկված գեներալ Ալեքսեևը «հաջող վիրահատությունից հետո գիտակցության է եկել՝ մինչ այդ գտնվելով արհեստական կոմայի մեջ»: Այդ մասին հայտնել է ռուսաստանյան «Կոմերսանտը»: Լրատվամիջոցին հայտնի է դարձել, որ մահափորձ կազմակերպելու և իրականացնելու կասկածանքով «ձերբակալվել է երկու անձ»: Նրանք հարցաքննվել են: Փետրվարի 8-ին ՌԴ Քննչական կոմիտեն կդիմի դատարան՝ առաջարկելով կասկածյալների նկատմամբ ընտրել խափանման միջոց: Ձերբակալված անձանց ինքնությունը չի հրապարակայնացվում: Ավելի վաղ ռուսաստանյան լրատվամիջոցները գրել են, որ Ալեքսեևի ուղղությամբ երեք կրակոց արձակած «անձը հավանաբար կին է»:
Գեներալ Ալեքսեևի դեմ մահափորձից կարճ ժամանակ հետո ՌԴ արտգործնախարար Լավրովն ասել է, որ դա վկայում է Ուկրաինայի նախագահ Զելենսկու՝ բանակցությունները տապալելու մտադրության մասին: Միջազգային մի շարք հեղինակավոր լրատվամիջոցներ գրել են, որ արևմտյան փորձագետները կասկածում են, թե այդ մահափորձը «կազմակերպել են Ուկրաինայի հատուկ ծառայությունները»:
Նույն օրը «Կոմերսանտը», հղելով իրավապահ մարմինների աղբյուրներին, ներկայացրել է մահափորձի մի պատկեր, որ շատ նման է մարտաֆիլմի դրվագի: Ըստ այդմ, հանցագործը գեներալ Ալեքսեևի ուղղությամբ նախապես արձակել է երկու կրակոց՝ նրան պատճառելով ոտքի և ձեռքի վիրավորում, ինչից հետո մահափորձի ենթարկվածը «փորձել է նրան վնասազերծել, բայց կրծքավանդակի շրջանում երրորդ վերքն է ստացել»:
Եթե այս տեղեկությունը հիմնավոր է, ապա պետք է ընդունել, որ ՌԴ ԳՇ Հետախուզության գլխավոր վարչության պետի առաջին տեղակալի սպանության փորձ կատարել է բոլորովին ոչ պրոֆեսիոնալ անձը: Հատուկ ծառայությունների գործակալը կամ վարձու մարդասպանը, որպես կանոն, զոհին զգետնում է նշանառու մեկ կրակոցով: Երկրորդը լինում է, ինչպես ռուսներն են ասում՝ «ստուգողական»:
Արտառոց է նաև վարկածը, որ կասկածյալը պահպանվող բազմաբնակարան շենք մուտք է գործել՝ «ներկայանալով որպես սննդի առաքիչ»: Դեպքը տեղի է ունեցել առավոտյան ժամը յոթի սահմաններում: Այդ վաղ ժամին «սննդի առաքիչի տեսքով» ներկայանալն ինքնին պետք է կասկած հարուցեր, եթե գեներալ-լեյտենանտ Ալեքսեևի բնակչության շենքն, իրոք, պահպանման տակ էր: «Կոմերսանտը» գրել է, որ շենքի բակում «գեներալին սպասել է ծառայողական մեքենան, նա սովորական ժամին պատրաստվել է մեկնել ծառայության վայր»:
Գեներալ Ալեքսեևի դեմ մահափորձը տեղի է ունեցել Աբու-Դաբիում ռուս-ամերիկա-ուկրաիանական «խորհրդատվությունների» երկրորդ փուլի ավարտի հաջորդ օրը և, ամենայն հավանականությամբ, առնչվում է ուկրաինական կարգավորման բանակցային գործընթացին: Խնդիր է, թե այդ ռեզոնանսային իրադաձության ենթատեքստը ո՞րն է: Որոշ տեղեկություններով՝ գեներալ Ալեքսեևը «լուրջ խնդիրներ ուներ «Վագներ» մասնավոր ռազմական խմբավորման ղեկավարության, իսկ վերջինս՝ Անվտանգության խորհրդի քարտուղար, պաշտպանության նախկին նախարար Շոյգուի հետ»: Ռուսաստանում, հնարավոր է, ռազմաքաղաքական բարձրագույն ղեկավարությունը «տրոհվում» է:
