«Բավական արդյունավետ այցելություն էր, վերջին շրջանում հաստատված այն միտումը, որ հայ պաշտոնյաները ռուս իրենց գործընկերների հետ շփվելիս փորձում են բարձրացնել հարցեր, որոնք հետաքրքրում են ՀՀ-ին, շատ կարևոր է, որովհետև նախկինում մենք հիմնականում տեսնում էինք պատասխաններ ռուսների կողմից հնչած մտահոգություններին, բայց չէինք տեսնում մեր կողմից մտահոգություններ: Ալեն Սիմոնյանը կարողացավ պաշտապնել ՀՀ-ի հիմնական հետաքրքրություններն այս այցի ընթացքում»,- Zarkerak.am-ի հետ զրույցում անդրադառնալով ԱԺ նախագահ Ալեն Սիմոնյանի ՌԴ այցին և արտգործնախարար Սերգեյ Լավրովի հետ հանդիպմանը՝ ասաց քաղաքագետ Ռոբերտ Ղևոնդյանը:
Խոսելով Սիմոնյանի այն հայտարարության մասին, թե ՀՀ-ին անհանգստացնում է Մոսկվայից հնչող հռետորաբանությունը՝ Ղևոնդյանը նշեց. «Ռուսաստանն այնպիսի պետություն չէ, որ կարող է ինչ-որ մի լրագրող կամ պատգամավոր կարծիք հնչեցնել, որը չեն ընդունում Կրեմլում, ընդհակառակը՝ նրանք բոլորն ուղղորդվում են Կրեմլից և նրանց բոլորի խոսքը պետք է գնահատել որպես Կրեմլի կողմից գոնե հավանության արժանացած տեսակետ, եթե ոչ ամբողջությամբ թելադրված, Սիմոնյանի հարցադրումները տեղին էին: Լավրովն էլ խոսեց ՌԴ-ի մտահոգություններից, այստեղ դերերը հավասարվել են և Ռուսաստանի մտահոգություններին Հայաստանը պատասխանում է իր մտահոգություններով»:
Ըստ քաղաքագետի՝ Ռուսաստանում դեռևս ամբողջապես չեն հասկացել, թե Հարավային Կովկասում ինչ փոփոխություններ են տեղի ունեցել վերջին հինգ-վեց տարիների ընթացքում. «ՌԴ-ում դեռևս կարծում են, թե իրենք ունեն ազդեցության գոտի մեր տարածաշրջանում և կարող են իրենց շահերն ավելի կարևոր համարվել ՀՀ-ում, քան հենց Հայաստանի շահերը, Ռուսաստանում սկսել են մի փոքր հասկանալ, որ այնուամենայնիվ ՀՀ-ն գնալու տեղ ունի և հանկարծ կարող է այն պետությունը, որ իրենք համարում էին իրենց գրպանում դրված՝ դուրս գալ»:
Ղևոնդյանն ընդգծեց, որ չնայած Լավրովը տարօրինակ համարեց հիբրիդային գործողությունների մասին խոսքերը, բայց հենց իր խոսքում հիբրիդային գործունեության տարրեր օգտագործեց. «Նա ևս մեկ անգամ հիշեցնում է, որ ԵԱՏՄ և ԵՄ անդամակցությունները համատեղելի չեն, այն դեպքում, երբ բոլորն էլ հասկանում են, որ դրանք համատեղելի չեն մեկ պետության դեպքում: Պարոն Լավրովը փորձում է նորից մանիպուլյացիաների դիմել և այսպիսով հենց ինքը դառնում է հիբրիդային գործողություններ իրականացնող պաշտոնյաներից մեկը: Նա մի կողմից պետք է սպառնար Հայաստանին, ինչը փաստացի արեց՝ հայտարարելով, թե ԵԱՏՄ-ից դուրս կգաք, եթե ԵՄ-ի հետ հարաբերությունները խորացնեք, մյուս կողմից էլ փորձում է փափուկ բարձ դնել Հայաստանի գլխի տակ՝ պահպանելով սպառնալից տոնը: Մոսկվայում հասկանում են, որ ձևավորված միջազգային հարաբերությունների պայմաններում Ռուսաստանը շատ մեծ գործիքներ չունի ՀՀ-ի որոշումների վրա ազդելու: Միայն ԵԱՏՄ-ից հանելու սպառնալիքը կամ տնտեսական որոշակի պատժամիջոցներն են մնացել, որոնք ՌԴ-ն կարող է օգտագործել ՀՀ-ի նկատմամբ»:
Ինչ վերաբերում է ռուս լրագրողների կողմից ՀՀ ներքաղաքական կյանքին վերաբերող հարցերին և Սիմոնյանի պատասխանին՝ Ղևոնդյանը նշեց. «Քանի որ հարցերը հնչում էին լրատվամիջոցների ներկայացուցիչների կողմից, ապա գոնե արտաքնապես Հայաստանը չի կարող մեղադրել ՌԴ-ին Հայաստանի ներքին կյանքին խառնվելու մեջ: Հետաքրքիր տպավորություն է ստեղծվում, կարծես Սիմոնյանը պատասխանում էր ոչ թե Ռուսասատանի մեդիայի ներկայացուցիչների հարցերին, այլ ՀՀ-ում ռուսական կողմնորոշում ունեցող քաղաքական ուժերի կողմից ֆինանսավորվող լրատվամիջոցների հարցերին, հարցերը շատ նման էին իրար: Ալեն Սիմոնյանն էլ ուղղեց նրանց սխալները, հերքեց պնդումները»:
Ռոբերտ Ղևոնդյանի խոսքով՝ ՀՀ-ն փորձում է Հայաստան-Ռուսաստան հարաբերությունները հավասարակշռել. «Սուբյեկտայնության բարձրացման որոշակի նշաններ կան: Հարցն այն է, որ նախկինում ակնհայտորեն խաթարված կողմերի միջև փոխհարաբերություններում շատ մեծ տարբերությունը ներկա իշխանությունները փորձում են հավասարակշռել, ինչը որոշակի առումով արդեն սկսել է ստացվել»:
