Ամփոփվել են «Հայաստանի դպրոցական լավագույն մինի այգի 2025» ամենամյա մրցույթի արդյունքները։ Նախաձեռնությունն իրականացրել են ԿԳՄՍ նախարարությունը, ՄԱԿ-ի Պարենի համաշխարհային ծրագիրը (ՄԱԿ ՊՀԾ), ՌԴ ճյուղային սննդի ինստիտուտը (SIFI) և «Դպրոցական սնունդ և երեխաների բարեկեցություն» հիմնարկը։
Այս անգամ մրցույթն անցկացվել է «Մեր դպրոցական այգու պահապանը» խորագրով՝ խթանելով աշակերտների ստեղծագործական մտածողությունն ու թիմային աշխատանքը, շրջակա միջավայրի նկատմամբ պատասխանատվության զգացումը։ Մասնակից դպրոցներին առաջարկվել է ստեղծել այգու խորհրդանշական պահապան-թալիսմաններ, մշակել դրանց պատմությունը և ձևավորել այգիները բնության հետ ներդաշնակության գաղափարով։ Մասնակիցները ոչ միայն իրենց հերոսների պատմություններն են հորինել և ձևավորել այգիները, այլև պատմությունները հասցրել են դպրոցների ագրո-խմբեր։
Մրցույթն անցկացվել է երկու հիմնական անվանակարգով՝
- «Դպրոցական լավագույն մինի այգի» (դպրոցամերձ բաց տարածքների համար):
- «Լավագույն այգին՝ պատուհանագոգին» (փակ տարածքների և պատուհանագոգերի օգտագործմամբ)։Մասնակցության հայտ է ներկայացրել 24 դպրոց ՀՀ 6 մարզից և Երևանից։ Մայիսին մեկնարկած ծրագրի շրջանակում բոլոր մասնակիցները ստացել են մասնագիտական խորհրդատվություն և մեթոդական աջակցություն՝ գաղափարները կյանքի կոչելու համար։
Մրցույթի պահանջներին համապատասխան՝ մասնակից դպրոցները մինչև 2025 թվականի դեկտեմբերի 1-ը ներկայացրել են իրենց նախագծային փաթեթները. հանձնաժողովի գնահատմանը ներկայացվել է 13 ամբողջական նախագիծ։
Հանձնաժողովի կազմում ընդգրկված էին ԿԳՄՍ նախարարության, ինչպես նաև տեղական և միջազգային կազմակերպությունների՝ ՄԱԿ-ի Պարենի համաշխարհային ծրագրի, ՌԴ Ճյուղային սննդի ինստիտուտի, «Դպրոցական սնունդ և երեխաների բարեկեցություն» հիմնարկի, Հայ օգնության ֆոնդի, «Արմենիա Թրի Փրոջեքթ» բարեգործական հիմնադրամի և «Կանաչ արահետ» ՀԿ-ի ներկայացուցիչներ։
Մրցույթի հաղթողները
«Դպրոցական լավագույն մինի այգի» անվանակարգի հաղթողներն են՝
- Լանջաղբյուրի Վ․ Ադամյանի անվան միջնակարգ դպրոցը (Գեղարքունիքի մարզ)
- Նոր Գեղիի Յու․ Երիցյանի անվան թիվ 2 միջնակարգ դպրոցը (Կոտայքի մարզ)
- Ծակքարի միջնակարգ դպրոցը (Գեղարքունիքի մարզ)։«Լավագույն այգին՝ պատուհանագոգին» անվանակարգում հաղթող է ճանաչվել Նեղոցի Արթուր Բեկջանյանի անվան հիմնական դպրոցը (Լոռու մարզ)։
Հանձնաժողովը նաև շնորհել է․
- Խրախուսական մրցանակ 4-րդ տեղի համար Վանաձորի Ծովակալ Իսակովի անվան թիվ 23 հիմնական դպրոցին (Լոռու մարզ)
Խրախուսական մրցանակ 5-րդ տեղի համար Գեղարքունիքի միջնակարգ դպրոցին (Գեղարքունիքի մարզ)։«Դպրոցական լավագույն մինի այգի» անվանակարգում առաջին տեղը զբաղեցրած դպրոցը կստանա մրցանակ՝ 3000 ԱՄՆ դոլարին համարժեք դրամի չափով, իսկ 2-5-րդ տեղերը զբաղեցրած դպրոցները՝ իրենց դպրոցական ճաշարանների համար նախատեսված մրցանակներ։
Բացի այդ՝ մրցույթի կազմակերպիչները սահմանել են խրախուսական մրցանակներ այն դպրոցների համար, որոնք մի քանի տարի շարունակ մասնակցել են մրցույթին և ցուցաբերել հետևողական ջանք դպրոցամերձ այգիների մշակման գործում։
«Հայաստանի դպրոցական լավագույն մինի այգի» մրցույթը «Դպրոցական սնունդ» ծրագրի առանցքային բաղադրիչներից է: Այն նպատակ ունի զարգացնել դպրոցամերձ այգիները՝ հարստացնելով աշակերտների սննդակարգը տեղական թարմ բարիքներով և նրանց փոխանցելով օրգանական գյուղատնտեսության ու կայուն հողօգտագործման հմտություններ։
2021 թվականին մեկնարկած այս նախաձեռնությունն արդեն վերածվել է ամենամյա ավանդույթի՝ կրթելով բնության հանդեպ հոգատար և գյուղատնտեսական հմտություններով զինված նոր սերունդ։
