«Հանրապետություն» կուսակցության անդամ, Երևանի ավագանու համանուն խմբակցության ղեկավար Անի Խաչատրյանի խոսքով՝ Հայաստանում ինչ կատարվում է, ասում են՝ քաղաքական է: Միաժամանակ նա նկատում է՝ բնական է, նախընտրական պրոցեսներ են սպասվում, ամեն բան պետք է քաղաքականացվի:
Այս մասին վերջինս ասում է «Հայկական ժամանակ»-ի տաղավարում՝ մեկնաբանելով Գերագույն հոգևոր խորհրդի անդամ հանդիսացող 7 անձի մեղադրանք առաջադրելը և դրա հետ կապված հնչող շահարկումները:
«Որոշ եկեղեցականներ մտել են քաղաքականություն և դարձել քաղաքական գործիչներ, եթե ստանում են քաղաքական գնահատականներ, դա ոչ եթե եկեղեցականների, այլ քաղաքական գործիչների գնահատականներ են: Կաթողիկոսը եկեղեցին և հասարակությունը չպետք է կտրեր իրարից, այլ իր կամքով հեռանար, բայց պայքարում է, որ մնա, որպեսզի փրկի սեփական կաշին․ ինչ-որ բաներ կորցնելու վախ ունի: Եթե եկեղեցական են, չի նշանակում, որ ինչ ուզենան պետք է անեն»,- ասում է նա:
Անդրադառնալով Ռոբերտ Քոչարյանի վերջին ասուլիսին և TRIPP-ի վերաբերյալ նրա մտահոգություններին՝ Խաչատրյանն ընդգծում է. «ԱՄՆ-ն միլիարդավոր դոլարներ է ներդնում ՀՀ-ում, որից Պուտինի թեկնածու Քոչարյանը իրեն վատ է զգում: Ցնցումների ու հիստերիկայի մեջ են, որ ոչնչանում են, իր քաղաքական գերեզմանն է տեսնում Քոչարյանը: Քոչարյանն ուզում է ցույց տալ, թե ուժեղ տղա է, բայց ուժեղ տղերքի ժամանակները վաղուց անցել են, և հետո չենք մոռացել Մեղրիի հետ կապված բանակցությունները: Հայաստանի Հանրապետությունում չկա մի մայր, որ ուզում է պատերազմ. խաղաղության պայմանագիրը ոչ ոք չի կարող չեղարկել»:
«Հանրապետություն» կուսակցության անդամն ասում է՝ դեմ չէ «սեքսի նախարարություն» ստեղծելուն, սակայն մի պայմանով. «Եթե Սարգիս Կարապետյանի ընտանիքի կանայք լինեն առաջին շահառուները: Եթե իրենց ընտանիքում կան անբավարարված կանայք, թող չխառնի ՀՀ-ում բնակվող կանանց հետ»:
Խաչատրյանը միաժամանակ շեշտում է. «Ես կմիջնորդեմ Երևանի բուժհաստատություններին իրենց անվճար բուժման պրոցեսն անելու համար: Ճիշտ տեղից են սկսել իրենց քաղաքական դերը՝ կրկեսից, դրա համար այն արագ բացեցին: Կարապետյանները և Քոչարյանը նույն գծի մեջ են իրենց աշխարհաքաղաքական տիրոջով միասին»:
Անի Խաչատրյանը այն համոզմանն է, որ ընդդիմությունը մահապարտների գունդ չպետք է լինի, այլ պետք է օգնի իշխանությանը, խնդիրները վեր հանի:
Առավել մանրամասն՝ տեսանյութում:
