Կոլումբիայում կործանվել է Beechcraft 1900 ուղևորատար ինքնաթիռը, որը տեղափոխում էր 15 մարդ, ներառյալ՝ անձնակազմ և ուղևորներ:
Իսպանական El País թերթը, հղում անելով քաղաքացիական ավիացիայի վարչության և տրանսպորտի նախարարության կողմից ինքնաթիռի անհետացման մասին հաղորդագրություններից հետո ստեղծված համատեղ հրամանատարական կենտրոնին, հայտնել է, որ կենդանի մնացածներ չկան։
HK4709 գրանցման համարով ինքնաթիռի հետ վերջին կապը հաստատվել է տեղական ժամանակով ժամը 11:54-ին (Երևանի ժամանակով ժամը 20:54-ին), Կոլումբիայի Կուկուտա քաղաքից թռիչքից 12 րոպե անց։
Ինքնաթիռը մեկնել է Կուկուտա քաղաքի Կամիլո Դազա օդանավակայանից և պետք է ժամաներ Օկանյա նահանգի Ագուաս Կլարաս օդանավակայան մոտավորապես տեղական ժամանակով ժամը 12:05-ին (Երևանի ժամանակով ժամը 21:05-ին):
Ինքնաթիռը վարձակալվել է կոլումբիական Satena ավիաընկերությունից Searca առևտրային ուղևորատար չարթերային ավիաընկերության կողմից։
Ինքնաթիռի կոորդինատները վերջին անգամ գրանցվել են Պլայա դե Բելեն և Ջակարի համայնքների միջև գտնվող լեռնային տարածքում: Ավիաընկերությունը պարզաբանել է, որ ինքնաթիռի արտակարգ տեղորոշիչ ազդանշանը չի ակտիվացել։
Հյուսիսային Սանտանդերի անվտանգության նախարար Խորխե Կինտերոն Կարակոլին ասել է, որ ինքնաթիռը հայտնաբերվել է տարածքում գտնվող տեղի բնակիչների կողմից:
«Նրանք գտել են ինքնաթիռը լիովին ավերված, և այս պահին մենք որևէ տեղեկություն չունենք որևէ ողջ մնացածի մասին», — ասել է Կինտերոն:
Ուղևորների թվում են եղել երկրի Ներկայացուցիչների պալատի գործող անդամ Դիոգենես Քվինտերո Ամայան և թեկնածու Կառլոս Սալսեդոն, որոնք առաջադրվել էին ներքին հակամարտությունից առավել տուժած տարածքների խորհրդարանի անդամների համար նախատեսված հատուկ ընտրական քվոտայով («խաղաղության քվոտա»)։
Սա վերաբերում է կառավարության և Կոլումբիայի հեղափոխական զինված ուժերի (FARC) միջև հակամարտությանը։ 2016 թվականին Կոլումբիայի կառավարությունը FARC ապստամբների հետ ստորագրել է վերջնական խաղաղության համաձայնագիր՝ 50 տարվա զինված հակամարտությունից հետո։
