«Այս որոշմամբ մենք հաստատում ենք հանրային առողջապահական ամենակարևոր երաշխիքներից մեկը հանդիսացող պատվաստումների ազգային օրացույցը, նաև պատվաստումների վերաբերյալ միջազգային վկայականների տրամադրման ձևաչափը և այն թիրախները, որոնք մեզ համար դնում ենք պահպանելու 0-1 տարեկան երեխաների պատվաստումների ցուցանիշների առումով և վարակիչ-վտանգավոր հիվանդությունների զրոյական դեպքերը պահպանելու մեր այսօրվա իրավիճակը»,- կառավարության նիստում, զեկուցելով 2026-2030 թվականների իմունականխարգելման ծրագիրը հաստատելու մասին հարցը, ասաց Առողջապահության նախարար Անահիտ Ավանեսյանը:
«Վերջին տարիներին ներդրել ենք նոր պատվաստանյութեր, վերջին սերնդի ավելի համակցված վեցավալենտ պատվաստանյութեր, որոնք զերծ են պահում մի քանի անգամ պատվաստվելու խնդրից: Ջրծաղիկի պատվաստանյութը այլևս մեր օրացույցի մաս է կազմում: Վարակիչ հիվանդությունների կանխարգելման առումով պատվաստումների և նաև հանրության մոտ տեղեկատվական աշխատանքն իր պտուղները տալիս է. 2025-ին 0-1 տարեկան երեխաների պատվաստումների ցուցանիշում գրանցել ենք 2011 թվականից ի վեր 95.1 տոկոս, որն ամենաբարձր ցուցանիշն է»,- ասաց նախարարը:
Նախարաը նշեց, որ կա տեղեկատվական ապակողմնորոշման հանգամանք և շատ մեծ ուշադրություն են դարձնում ծնողների հետ աշխատանքին.«Մեր նպատակն է, որ ջրծաղիկի դեմ պատվաստվելուց արդեն կայուն իմունիտետով զորակոչվեն, այս հիվանդացություն առաջացնող և աշխատանքերի շատ մեծ խոչընդոտ հանդիսացող ջրծաղիկի հիվանդությունը մենք այլևս ՀՀ-ում չունենանք ոչ բռնկումներ, ոչ էլ դեպքեր»:
Վարչապետ Նիկոլ Փաշինյանն արձագանքեց.«Ասացիք, որ մինչև 1 տարեկան երեխաների դեպքում պատվաստման թվերը հաջողվում է բարձրացնել, իսկ բնակչության շրջանում պատվաստվածների տեսակարար կշռի առումով մեզ հաջողվու՞մ է առաջընթաց ապահովել, հակաքարոզչությունը պատվաստման դեմ անընդհատ ինչ-որ աղբյուրներ ունի, ժամանակ առ ժամանակ տեսանելի է դառնում»:
«Թիրախային երեք պատվաստումներ ունենք, որ 0-1 տարեկան երեխաների համար ենք՝ ՄՊՊ՝13-16 տարեկան դեռահասների համար կանխարգելում է քաղցկեղը, գրանցել ենք 2025-ին 48 տոկոս ընդգրկվածություն, 2021՝ 10,8 տոկոսի: Հաջորդը գրիպի դեմ պատվաստանյութերի ցուցանիշներն են, այս տարի շատ ավելի վաղ ենք սկել ՝ 200.000 դեղաչափից 95 տոկոսի իրականացրել ենք: Ջրծաղիկի պատվաստումներն իրականացնում ենք նախազորկոչային և զորակոչային տարիքի մեր քաղաքացիների համար: Ունենք 10-ից ավել պատվաստումներ: Երեխաների համար անհատական ծրագիր կա և միշտ տեղյակ են պահվում ծնողները, որ պատվաստման ժամանակն է, յուրաքանչյուր երեխա իր անհատական պլանն ունի և իր կյանքի ընթացքում այն իրագործվում է»,- ասաց նախարարը:
«Սա նշանակում է, որ մենք անուն-ազգանունով, հասցեով գիտենք այն ծնողներին, ովքեր հրաժարվում են իրենց երեխային պատվաստելուց»,- արձագանքեց վարչապետը:
