«Աբու Դաբիի կայունության շաբաթի» (Abu Dhabi Sustainability Week – ADSW 2026) շրջանակում կազմակերպվել է միջազգային ցուցահանդես, որտեղ ներկայացված են կլիմայական համարձակ գործողություններին, նորարարական տեխնոլոգիաներին և կայուն զարգացմանը միտված առաջատար նախաձեռնություններ աշխարհի տարբեր երկրներից։
Ցուցահանդեսը մի հարթակ է, որտեղ համախմբվում են պետություններ, ստարտափներ և տեխնոլոգիական կազմակերպություններ՝ կիսվելու փորձով և ձևավորելու ավելի կայուն ապագայի լուծումներ։ Այս մասին ֆեյսբուքյան իր էջում գրել է շրջակա միջավայրի նախարար Համբարձում Մաթևոսյանը:
«Առանձնահատուկ ուրախ էի այդ նախաձեռնությունների շարքում տեսնել նաև հայկական նախագծեր, որոնք իրենց ներդրումն են բերում գլոբալ կայուն զարգացման օրակարգին։
Areg AI-ը հայկական տեխնոլոգիական նախաձեռնություն է, որը մշակել է արևային էներգիայի կառավարման խելացի ծրագրային հարթակներ և ռոբոտացված լուծումներ։ Այն օգտագործում է արհեստական բանականություն՝ արևային էլեկտրակայանների աշխատանքը առավել արդյունավետ կազմակերպելու, մշտադիտարկելու և տեխնիկական վիճակը բարձր մակարդակի վրա պահելու համար։
Հայկական նորարարական մտքի ներկայությունը ADSW 2026-ում ևս մեկ անգամ ցույց է տալիս, որ Հայաստանը կարող է մրցունակ լուծումներ առաջարկել կայուն զարգացման ապագայի համար»,- գրել է նախարարը։
