Տեր Արամ քահանա Ասատրյանը սոցցանցի իր էջում գրառմամբ անդրադարձել է հոգևոր հայրերի վերջին քայլերին և գրել.
«Սիրելի հավատավոր քույրեր և եղբայրներ, երբ ես սեպտեմբեր ամսին իմ էջով երեք գրառում արեցի եկեղեցական մեր կյանքն աղճատող ու հասարակական անդորրը խաթարող, շտկման և վերանորոգման կարոտ երևույթների մասին, մի շարք հոգևորականներ, եկեղեցու տարատեսակ և կասկածելի ծագմամբ «պաշտպաններ», ֆեյքերեցներ, ֆեյքեր ու ֆեյքուհիներ շտապեցին կռահել, թե ես ընդվզում եմ եպիսկոպոսի կամ կաթողիկոսի դեմ և հավակնում եմ Լուսավորչի Թադեական Գահին։
Իրականության մեջ ես չէի տվել որևէ եպիսկոպոսի անուն, ոչ էլ ընդվզել էի կաթողիկոսի աթոռն զբաղեցրած անձի դեմ։ Փոխարենը ստանում էի և շարունակում եմ ստանալ աշխարհի ամենանողկալի լուտանքներն ու մեղադրանքները։
Ճեմարանի ընդունելության քննության անցողիկ շեմը հաղթահարելու անընդունակ ամեն պատահական երևույթ ինձ Հուդա էր կոչում։ Փողոցային, անդաստիարակ, անուղղելի սրիկայի վարք ունեցող իբրև թե «եպիսկոպոսներ» իրենց բնորոշ միջոցներով սպառնալիքներ էին փոխանցում ինձ, հետո՝ սեփական վախերին տուրք տալով, հերքում փոխանցված սպառնալիքները։
Հիմա, երբ մեր Սրբասուրբ Եկեղեցուն պատուհասած գլխավոր չարիքի դեմ ծառանում են իրավ սրբազաններ, որոշ հոգևորականներ հոգու պարտք են համարում չլռելը և հանդգնում են ամոթանք և աստվածաբանության դաս տալ եպիսկոպոսների, ովքեր իրենց խղճի մտոք և ի պաշտպանություն ճշմարտության սեփական արարքով են փաստել իրենց արդարասիրությունը։
Իմ խորին երախտագիտությունը, որդիական սերն ու շնորհակալությունն եմ հայտնում Գերաշնորհ Տ. Հովնան, Նավասարդ, Աբրահամ, Առաքել, Սիոն, Վազգեն, Անուշավան, Վրթանես, Արտակ, Գևորգ Սրբազան Հայրերին»։
Հիշեցնենք՝ Տեր Մաշտոց քահանա Ստեփանյանը և Տեր Մկրտիչ քահանա Մուշադյանը, Տեր Մովսես քահանա Աշուրյանը, Տեր Պողոս քահանա Միքայելյանը, Տեր Գալուստ քահանա Սահակյանը, Տեր Անուշավան քահանա Կոշեցյանը, Տեր Արարատ քահանա Օրդոյանը, Տեր Շմավոն քահանա Ղևոնդյանը, Տեր Աշոտ քահանա Սաֆարյանը, Ռաֆայել Պետրոսյանը (նախկին՝ Հայր Վազգեն աբեղա), Ռազմիկ սարկավագ Պետրոսյանը, Ռուբեն սարկավագ Պետրոսյանը, Տեր Պարթև քահանա Մուրադյանը, Տեր Զգոն քահանա Աբրահամյանը, Տեր Վահան քահանա Առաքելյանը, Տեր Երվանդ քահանա Բաբայանը և Տեր Դանիել քահանա Տերտերյանը, Մայր Աթոռ Սուրբ Էջմիածնի միաբան Հայր Արիստակես վարդապետ Այվազյանը, Տեր Շնորհք քահանա Մարտիրոսյանը, Տեր Համազասպ քահանա Հագեյանը, Տեր Սմբատ քահանա Աբրահամյանը, Տեր Ժիրայր քահանա Խաչատրյանը, Տեր Շահան քահանա Միրզոյանը, Տեր Վարդան քահանա Ներսիսյանը, Տեր Սիոն քահանա Սաֆարյանը, սարկավագ Պետրոս Ղազարյանը հայտարարել են, որ միանում են ՀՀ վարչապետի և տասը եպիսկոպոսների՝ եկեղեցու բարենորոգման հայտարարությանը:
