«Ասում են՝ Կառավարությունը արտոնություն տվեց ծանոթին ու բարեկամին, հիմա ասեք՝ իրենք արտոնություն ստացած ողջ ցուցակի քանի տոկոսն են կազմում»:
Այս մասին լրագրողների հետ ճեպազրույցում ասել է ՀՀ վարչապետ Նիկոլ Փաշինյանը՝ խոսելով արտոնություններ տալու մասին:
«Հարկային օրենսդրությունների վերաբերյալ հետաքրքիր վերնագրեր կան, թե Կառավարությունը արտոնություն տվեց բարեկամին, ծանոթին և այլն: Հիմա եկեք նայենք՝ այդ անուններն արտոնություն ստացածների քանի տոկոսն են: Այս արտոնությունների համակարգը կոչվում է գերակա ոլորտում մաքսային արտոնություններ տրամադրելու մասին, հազարավոր գործարարներ այդ արտոնությունը ստացել են, այդ թվում՝ ընդդիմության հետ կապված գործարարներ: Կառավարության կարգավորումներն այնպիսին են, որ համակարգն աշխատում է ինքնաշխատ համակարգով:
Կա մոդուլ՝ գործարարները և ընկերությունները իրենց տվյալները լրացնում են ու ներկայացվում են արտոնությունից օգտվելու: Կառավարության միակ դերը ստուգելն է՝ արդյոք իրենց դրած տվյալները համապատասխանո՞ւմ են իրականությանը, թե՞ ոչ: Եթե համապատասխանում են, Կառավարությունը իրավունք չունի այդ արտոնությունը չտալու»,- նշել է նա:
Անդրադառնալով արտոնություններ ստացած գործիչներին՝ Փաշինյանը նշել է, որ քննարկվող անունները կան արտոնություններ ստացած անձանց մեջ, բայց նրանք 2 տոկոսն են կազմում ողջ ցուցակի:
«Դուք տալիս եք կամայական անուններ, ձեր նշած անունները արտոնություններ ստացած հազարավոր ընկերությունների 2% են: Եթե այդ ընկերությունների մեջ կան այնպիսիք, որ ինձ բարեկամ են, ապա համոզված եղեք, որ կան նաև ձեզ բարեկամներ: Ես բացառում եմ, որ լինի որևէ ընդդիմադիր պատգամավոր ու քաղաքական գործիչ, որի բարեկամներից մեկը այդ արտոնություններից ստացած չլինի: Այո, տվել ենք ու էլի կտանք»,- նշել է վարչապետը:
