Ազգային ժողովի «Քաղաքացիական պայմանագիր» խմբակցության պատգամավոր Ալխաս Ղազարյանը «Ֆեյսբուք»-ի իր էջում գրառում է կատարել՝ ամփոփելով 2025 թվականը, արձանագրել ձեռքբերումները և ներկայացրել 2026 թվականի անելիքները:
Սիրելի՛ հայրենակիցներ,
Ամփոփելով 2025 թվականը՝ պետք է փաստենք, որ Հայաստանի Հանրապետությունը և նրա քաղաքացիները պատմականորեն առաջին անգամ ապրեցին մեկ ամբողջական խաղաղ տարի։ Սա, թերևս, այն մեծ և աննախադեպ ձեռքբերումն է, որ ունեցել ենք 2025 թվականին: Միաժամանակ պետք է նշել, որ այն հնարավոր է դարձել մեր կառավարության, նրա ղեկավարի և խորհրդարանի ճիշտ ու ակտիվ աշխատանքի շնորհիվ արտաքին և ներքին քաղաքական, դիվանագիտական, անվտանգային, տնտեսական և այլ ուղղություններով:
Այս համատեքստում, թերևս, անկյունաքարային էին օգոստոսի 8-ին Վաշինգտոնում ստորագրված և նախաստորագրված փաստաթղթերը, որոնք նոր էջ բացեցին խաղաղության օրակարգի կյանքի կոչման հարցում՝ նախանշելով նաև Հայաստանի համապարփակ զարգացման նոր և աննախադեպ հնարավորություններ:
Սիրելի՛ հայրենակիցներ,
2026 թվականը լինելու է վերոնշյալ ձեռքբերումները գործնականում իրականացնելու տարի և, հետևաբար, շրջադարձային՝ մեր պետության և յուրաքանչյուրիս համար։
Տարին նախընտրական է՝ ակտիվ քաղաքական զարգացումներով, որոնց հանգրվանը պետք է լինի խաղաղության օրակարգի, Իրական Հայաստանի գաղափարախոսության և Հայաստանի իրական ինքնիշխանության ամրագրումը։
Սիրելի՛ հայրենակիցներ, հարգելի՛ ընկերներ,
Շնորհավորում եմ բոլորիս 2026 թվականի կապակցությամբ և մաղթում խաղաղություն, ներդաշնակություն և բարօրություն յուրաքանչյուրիս ընտանիքներում։
Սիրում եմ բոլորիդ,
Շնորհավոր Ամանոր և Սուրբ Ծնունդ»,- գրել է նա:
