Ինչպես հայտնել էինք ավելի վաղ, Գյումրիում զանգվածային անկարգություններ կատարելու դեպքի առթիվ նախաձեռնված քրեական վարույթի նախաքննության ընթացքում դեկտեմբերի 5-ին ևս 4 անձի նկատմամբ հարուցվել էր հանրային քրեական հետապնդում: Նրանց թվում է նաև Գյումրու քաղաքապետ Վարդան Ղուկասյանի փեսան՝ փոխքաղաքապետ Ավետիս Առաքելյանը:
ՀՀ քննչական կոմիտեից «Հայկական ժամանակ»-ի հետ զրույցում հայտնեցին, որ Ավետիս Առաքելյանն ունի մեղադրյալի կարգավիճակ:
«Ավետիս Առաքելյանին մեղադրանք է ներկայացված ՀՀ ՔՕ 327, 441, 46-452 հոդվածներով՝ համապատասխանաբար Զանգվածային անկարգություններին մասնակցելը, Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, Պաշտոնատար անձի օրինական ծառայողական կամ քաղաքական գործունեությանը միջամտելուն օժանդակելը»:
Գյումրու փոխքաղաքապետի նկատմամբ որպես խափանման միջոց է ընտրված բացակայելու արգելքը:
Հիշեցնենք՝ Գյումրի համայնքի մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով հոկտեմբերի 20-ին ձերբակալվել էր 8 անձ, այդ թվում՝ Գյումրու քաղաքապետ Վարդան Ղուկասյանն ու քաղաքապետարանի գլխավոր ճարտարապետը:
Ոստիկանական գործողությունների ժամանակ բախումներ էին եղել Ղուկասյանի աջակիցների ու ոստիկանների միջև:
Բացի այդ՝ Վարդան Ղուկասյանի համակիրները ծակել էին ոստիկանության մեքենայի անիվները:
Գյումրու փոխքաղաքապետ Ավետիս Առաքելյանը, որը նաև Վարդան Ղուկասյանի փեսան է, Ղուկասյանի ձերբակալումից հետո հայտարարել էր, թե քաղաքապետարանը հայտարարում է անժամկետ գործադուլ:
