Քաղաքագետ Դավիթ Ստեփանյանը կարծում է, որ մենք 30 տարվա վաղեմության մեր սխալներն ենք ուղղում. հարաբերություններ չէինք զարգացնում այլ երկրների հետ, ինչը բերեց 44-օրյա պատերազմի:
Այս մասին նա ասում է «Հայկական ժամանակ»-ի տաղավարում՝ անդրադառնալով վարչապետ Նիկոլ Փաշինյանի այցին Գերմանիա:
«Հայաստանը պետք է շարունակի իր ճանապարհը դեպի Եվրամիություն: Այս ճանապարհով, որ գնում է ՀՀ իշխանությունը, Ալիևին քարշ տալով խաղաղություն տանելու ճանապարհն է»,- նկատում է նա՝ հավելելով. «Ադրբեջանն ուզում է՝ ՀՀ-ն բարձր մակարդակով խոսի ղարաբաղցիների Ղարաբաղ վերադարձի մասին, որ ինքն էլ հանգիստ փաթեթավորի ադրբեջանցիների վերադարձը ՀՀ, ուզում է կոնֆլիկտը տեղափոխել Հայաստանի տարածք»:
Դավիթ Ստեփանյանն այն համոզմանն է, որ Ռուսաստանը երբեք չի ցանկացել, որ Ղարաբաղը դառնա անկախ կամ Հայաստանի մաս:
Անդրադառնալով ՀՀ-ում ՌԴ դեսպան Սերգեյ Կոպիրկինի և Առաջին նախագահ Լևոն Տեր-Պետրոսյանի պարբերաբար դարձած հանդիպումներին՝ քաղաքագետը նկատում է. «Մտահոգիչ կլիներ, որ Կոպիրկինը հանդիպեր երիտասարդ քաղաքական գործիչների հետ. Լևոն Տեր-Պետրոսյանը մնացել է անցյալում»:
Ինչ վերաբերում է Գարեգին Բ-ի (Կտրիճ Ներսիսյան) շուրջ ստեղծված աղմուկին, զրուցակիցն ասում է՝ նա չի հեռանում, քանի որ սեղանին շատ մեծ խաղադրույք է դրված, որը չի սահմանափակվում անձամբ կաթողիկոսի դերակատարմամբ:
«Կաթողիկոսը ՀՀ-ում ներկայացնում է ՌԴ-ի շահերը: Նա հնարավորինս երկար է փորձելու մնալ իշխանության»,- ասում է նա՝ նկատելով. «Կտրիճ Ներսիսյանը չի կարող 10 եպիսկոպոսի կարգալույծ անել»:
Վերջինս կարծում է, որ այս հարցի շուրջ վարչապետի՝ փափուկ ուժի վրա արած խաղադրույքը շատ ճիշտ է:
Խոսելով Ռոբերտ Քոչարյանի մասին՝ Ստեփանյանն ասում է. «Մարդ, որ եկել է իշխանության արյան միջոցով և մնացել է արյամբ, անընդհատ ուզում է, որ արյուն թափվի: Ուզում է, որ այն խարանը, որ կա իր վրա, գործող իշխանության վրա էլ լինի»:
Առավել մանրամասն՝ տեսանյութում:
