«Հիմա մենք աշխատում ենք, մենք պայման չունենք Խաղաղության համաձայնագիրը ստորագրելու, Ադրբեջանն այդքան էլ պարզ չի՝ պայման ունի, պայման չունի, իրենք այդ թեմաներն առաջ են քաշում և մենք այդ թեմաների հետ առնչվում և առերեսվում ենք»:
Այս մասին Գերմանիայում լրագրողների հետ հանդիպման ժամանակ ասել է ՀՀ վարչապետ Նիկոլ Փաշինյանը՝ արձագանքելով լրագրողի ասածին, թե այս պահին Հայաստանին և Ադրբեջանին պայմանագիր կնքելու համար խանգարո՞ւմ է Ադրբեջանի առաջ քաշած պայմանը՝ Սահմանադրությունը փոփոխելը։
«Եթե Ադրբեջանը մտածում է, որ մեր Սահմանադրության մեջ տարածքային պահանջներ կան, այդ խնդիրը լուծելու ամենակարճ ձևը Խաղաղության համաձայանգիրը ստորագրելն է։ Որովհետև երբ-որ Խաղաղության համաձայնագիրը ստորագրվի, մենք մեր օրենսդրությանը համաձայն պարտավոր ենք, ստիպված ենք, չենք կարող չուղարկել Սահմանադրական դատարան, որպեսզի դատարանը ստուգի այդ համաձայանգրի համապատասխանությունը Հայաստանի Հանրապետության Սահմանադրությանը»,-ասել է Փաշինյանը։
Նա հավելել է, որ չունի լեգիտիմություն ՀՀ ժողովրդին ասելու, թե եկեք Սահմանադրությունը փոխենք։
«Ինչու, որովհետև ՀՀ ժողովուրդը ինձ կասի, 2024 թվականի սեպտեմբերին մեր Սահմանադրական դատարանը որոշում է կայացրել, որ Ալմա-Աթայի հռչակագիրը համապատասխանում է մեր Սահմանադրությանը, հետևաբար ինչու փոխենք մեր Սահմանադրությունը, կստացվի որ մենք քմահաճույքի համար ուղղակի փոխում ենք, բա որ դրանից հետո 2-րդ կամ 3-րդ քմահաճույքը ի հայտ եկավ, ինչ ենք անելու»,-ասել է Փաշինյանը։
Նա ավելացրել է, որ Ադրբեջանի հետ չեն քննարկում Սահմանադրության հարցը, որովհետև դա Հայաստանի ներքին հարցն է։
