Դպրոցների կամ մանկապարտեզների դասապրոցեսը կանգնեցնելու իրավիճակ չունենք, սակայն ունենք աշխատանքի հստակ մեթոդ և գծագրված մեխանիզմ, ըստ որի՝ այն դասարանները, որտեղ բացակայությունների թիվը 20 տոկոսից ավելի է, այդ դասարանները կարող են անցնել հեռավար ուսուցման:
Այս մասին «Ֆեյսբուք»-ում տարածած տեսանյութում ասել է ՀՀ առողջապահության նախարար Անահիտ Ավանեսյանը՝ անդրադառնալով սուր շնչառական վարակներով պայմանավորված համաճարակային վիճակին և կրթական պրոցեսի կազմակերպմանը:
Դիմելով հասարակությանը՝ նախարարը տեղեկացրել է, որ բոլոր գործիքները կիրառվում են ըստ ցուցման, և եթե լինի համաճարակաբանական այնպիսի իրավիճակ, որ կարիք կլինի որոշումներ կայացնել ընդհանուր դասապրոցեսի մասով, դա կարվի:
Ինչ վերաբերում է պատվաստումներին, ապա Ավանեսյանը հորդորել է օր առաջ պատվաստվել:
«Այսօր շրջանառվող գրիպի շտամը Ա տիպի շտամ է և բավականին ագրեսիվ է: Դրա պատվաստանյութում առկա հակամարմինները, վստա՛հ եղեք, պաշտպանական շերտ կձևավորեն, և չեք վարակվի այս տարվա ագրեսիվ շտամով կամ վարակվելու պարագայում թեթև ախտանշաններ կլինեն»,- ասել է նա:
