Էկոպարեկային ծառայության կադրային համալրման բազմափուլ գործընթացը թևակոխել է իր ամենավճռական՝ հարցազրույցի փուլը, որն ամփոփում է ֆիզիկական պատրաստվածության ստուգումներն ու մասնագիտական գիտելիքները գնահատող մրցութային թեստավորումը։
Ինչպես հայտնել է ծառայությունը, դեկտեմբերի 8-ին անցկացված փուլը նպատակ է ունեցել բացահայտել այն թեկնածուներին, ովքեր ունեն ոչ միայն անհրաժեշտ գիտելիքներ ու պատրաստվածություն, այլև տիրապետում են բարձրագույն անձնային որակների և էթիկայի՝ հանդիսանալու Ծառայության անբաժանելի մասը։
Հանձնաժողովը, որի կազմում են Ծառայության պետի տեղակալ Մուրադ Նուրիջանյանն ու գլխավոր քարտուղար Լուսինե Ալեքսանյանը, գնահատման ողջ գործընթացը կառուցել է խորքային ու բազմաշերտ հարցերի վրա՝ ընդգրկելով բնապահպանական օրենսդիր դաշտ, կենսաբազմազանության պահպանություն, էկոհամակարգերի կառավարում և իրական իրավիճակներում ճիշտ կողմնորոշվելու կարողություն։ Գնահատման թիրախում են եղել թեկնածուների պրոֆեսիոնալ պատրաստվածությունը, բարձր աշխատանքային էթիկան, պատասխանատվության զգացումը, անաչառությունն ու բարեխղճությունը, ինչպես նաև մարտահրավերային ու կոնֆլիկտային իրավիճակներում կողմնորոշվելու և քաղաքացիների հետ պատշաճ հաղորդակցվելու ունակությունը։
Թափանցիկության սկզբունքի պահպանումը եղել է գործընթացի անկյունաքարը, ապահովելով հավասար հնարավորություններ բոլոր մասնակիցների համար։ Հարցազրույցի արդյունքները կլինեն վերջնական գործոնը՝ որոշելու համար Տավուշի մարզային վարչության թափուր հաստիքները համալրող ապագա էկոպարեկային ծառայողներին։
