Ադրբեջանն ու Հայաստանը ապրում են իրենց ամենախաղաղ և կայուն շրջանը։
Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը՝ ելույթ ունենալով ԵԱՀԿ նախարարական խորհրդի 32-րդ նիստում:
«Մենք ընդգծում ենք պետությունների ինքնիշխանության, նրանց տարածքային ամբողջականության և սահմանների անձեռնմխելիության նկատմամբ հարգանքի անսասան արդիականությունը։ Մեր դառը փորձը ցույց է տալիս, որ այս սկզբունքները պետք է կիրառվեն հավասարապես և հետևողականորեն բոլորի նկատմամբ՝ առանց խտրականության կամ կրկնակի ստանդարտների։ Անցյալ տարվա դեկտեմբերից ի վեր զգալի առաջընթաց է գրանցվել Ադրբեջանի և Հայաստանի միջև հարաբերությունների կարգավորման գործընթացում, որը բարձր մակարդակի է հասել այս տարվա օգոստոսի 8-ին կայացած Վաշինգտոնի պատմական խաղաղության գագաթնաժողովի շնորհիվ»,- ասել է նա։
Կողմերը, ըստ Բայրամովի, հաստատել են, որ հակամարտությունն անցյալում է, նրանք մտադիր չեն վերադառնալ դրան և կսկսեն բարիդրացիական հարաբերություններ կառուցել՝ հիմնվելով առկա իրողությունների վրա։
«Գագաթնաժողովի ընթացքում ես և իմ հայ գործընկերը, շարունակելով այս տարվա մարտին ավարտված երկկողմ բանակցությունները, նախաստորագրեցինք «Ադրբեջանի Հանրապետության և Հայաստանի Հանրապետության միջև խաղաղության և միջպետական հարաբերությունների հաստատման մասին համաձայնագրի» նախագիծը՝ Ադրբեջանի, Հայաստանի և Միացյալ Նահանգների ղեկավարների մասնակցությամբ:
Այսօր Ադրբեջանն ու Հայաստանը ապրում են ամենահանգիստ և ամենակայուն շրջանը»,- նշել է նախարարը։
Նա նաև ընդգծել է «Թրամփի երթուղու» ժամանակին իրականացման կարևորությունը:
«Այս բազմամոդալ հաղորդակցման երթուղին պետք է ներառի երկաթուղային, ճանապարհային և այլ հաղորդակցություններ՝ ապահովելով անխափան կապ Ադրբեջանի մայրցամաքային մասի և Նախիջևանի Ինքնավար Հանրապետության միջև, միաժամանակ փոխադարձ օգուտներ բերելով Հայաստանին: Ինչպես բազմիցս նշվել է, հաղորդակցությունների բացման կարևորությունը ոչ միայն ազդում է Հայաստանի և Ադրբեջանի միջև խաղաղության կայունության վրա, այլև զգալի օգուտներ է բերում ավելի լայն մասշտաբով»,- ասել է նա:
