Քաղաքագետ Ռոբերտ Ղևոնդյանը «Ֆեյսբուք»-ի իր էջում գրառում է կատարել՝ անդրադառնալով հրապարակված բանակցային փաստաթղթերին:
«Հրապարակված փաստաթղթերում ինձ համար ամենատհաճը ՀՀ երրորդ նախագահի նամակ-աղերսն է ՌԴ նախագահին:
Ըստ էության, Սերժ Սարգսյանը 2016թ. աշնանն արդեն ամբողջապես պատկերացնում էր, թե ինչ աղետալի վիճակի է հասցրել Հայաստանն ու հայկական բանակը և հասկանում էր, որ անձամբ իր և իր թիմի կառավարչական-հրամանատարական անգրագիտությունը թույլ չի տալու ելք գտնել այդ իրավիճակից: Հետևաբար մնում էր աղերսել «տարածաշրջանի տիրակալին», որ նա զսպի Ալիևի ախորժակը:
Դե, իսկ դրա դիմաց կարելի էր Պուտինին զիջել ամեն ինչ, սկսած արժանապատվությունից (որն այս նամակից հետո կարելի է առ ոչինչ համարել) մինչև պետության էներգետիկ, տնտեսական և ռազմական համակարգերը»,- գրել է Ղևոնդյանը:
Հիշեցնենք՝ Կառավարությունը հրապարակել է Ղարաբաղյան հակամարտության կարգավորման բանակցային գործընթացին առնչվող պետական գերատեսչություններում առկա մի շարք փաստաթղթեր, որոնք պատկերացում են տալիս մինչև 2020 թվականը տեղի ունեցած բանակցային գործընթացի բովանդակության մասին։
Տեղադրված են նաև հրապարակայնորեն հասանելի մի շարք փաստաթղթեր, որոնք ուղիղ առնչություն ունեն առաջին խումբ փաստաթղթերի հետ։
Մեկ այլ հրապարակմամբ Կառավարությունը մանրամասնել է, թե ինչ է բացահայտում Ղարաբաղի բանակցային փաթեթը:
