ՀՀ վարչապետ Նիկոլ Փաշինյանը խորհրդարանում «ՀՀ 2026 թ. պետբյուջեի մասին» օրենքի նախագծի քննարկման իր եզրափակիչ ելույթում խոսել է արտաքին պարտքի մեծացման պատճառներից, որի մասին օրերս ԱԺ-ում հայտնել էր ֆինանսների նախարար Վահե Հովհաննիսյանը:
Ըստ վարչապետի՝ արտաքին պարտքն աճել է, որովհետև զենք է գնվել:
«Ընդդիմությունը մեզ մեղադրում է՝ ասելով, թե ինչու է պարտքը հասել 8 միլիարդ դոլարի։ Ի՞նչ եք արել։ Ես չէի ուզում ասել, բայց կասեմ՝ զենք ենք առել։ Պարտքո՞վ ենք առել։ Այո՛, պարտքով ենք առել, որովհետև մեզ միանգամից շատ զենք էր պետք»,- հայտարարել է նա։
Չհավատացողներին ՀՀ վարչապետն առաջարկել է ցույց տալ իր գնած զենքերը, անգամ՝ գնապիտակները։ Նա նշել է, որ անհամեմատելի են այժմյան զենքերի և նախկինում ունեցած հայկական զինանոցի նմուշները:
