«Ես Աստծո հետ իմ հարաբերություններում այլոց աջակցության կարիքը չունեմ, ասում եք՝ գնում եք պատարագի, մարդիկ չեն հավաքվում, ես պատարագի եմ գնում, ես չեմ գնում հանրահավաքի»,- ԱԺ-ում ճեպազրույցի ընթացքում այս մասին ասաց վարչապետ Նիկոլ Փաշինյանը՝ ի պատասխան հարցին, թե նա մասնակցում է պատարագների, բայց մեծ հանրություն չի հավաքվում:
Ինչ վերաբերում է իրեն ծափերով ընդունելուն՝ նշեց որ պատարագին ծափահարում են, թե չէ, որոշում է պատարագի մասնակցիը.«Ես գնում եմ պատարագի և ուրախ եմ, ինչպես ասել եմ՝ դա կարևոր է ինձ համար և մեր քաղաքական թիմի այն հատվածի, ովքեր հավատում են Աստծուն, դա ինձ համար հոգևոր և բարոյական նորոգման ճանապարհ է և ուրախ եմ այն մարդկանց համար, ովքեր գալիս են: Այս պատարագների շարքը շատ կարևոր է, որովհետև ես այդ օրակարգը ձևակերպել եմ և հետևողականորեն գնալու եմ այդ օրակարգով, սա կենդանի պրոցես է, խոսակցություն է տեղի ունենում Աստծո, հանրության հետ»:
Նա նշեց, որ առաջիկայում էլի է գնալու պատարագների և ստանալու է հաղորդություն, իսկ թե ինչու է գնում, մեկնաբանեց.«Խոսքը մեր սրսբության սրբոցի Մայր Աթոռի հոգևոր և բարոյական նորոգման մասին է և դրան հասնելու, մեր սրբության սրբոց մտնելու ճանապարհին մենք պետք է մաքրվենք, սա ինձ համար մաքրման ճանապարհ է: Չենք կարող ունենալ արժեքահենք հանրություն, եթե մեր սրբության սրբոցը աղտոտված է, բայց ի վերջո դա տեղի է ունեցել մեր միջավայրում, որովհետև մենք ենք թույլ տվել: Իհարկե գնալու եմ Մայր Աթոռ, երբ բավարար չափով մաքրված կզգամ ինձ, այն ժամանակ»:
