Մոսկվայում ձերբակալվել է սատիրայի թատրոնի նախկին տնօրեն, ծնունդով ադրբեջանցի Մամեդ Աղաևը:
Այս մասին գրել է ՏԱՍՍ-ը:
Ինչպես հայտնել է Ռուսաստանի ՆԳՆ պաշտոնական ներկայացուցիչ Իրինա Վոլկը, Աղաևը կասկածվում է բյուջետային միջոցներից 20 միլիոն ռուբլի հափշտակելու համար:
«Անհայտ հանցակիցների հետ, ըստ նախնական տեղեկատվության, նա կազմակերպել է Մոսկվայի բյուջե փոխանցելու համար նախատեսված գումարը գողանալու սխեմա։ Նա գրանցվել է որպես անհատ ձեռնարկատեր և կեղծ հեղինակային պայմանագրեր է կնքել իր ղեկավարած թատրոնի հետ։ Այս փաստաթղթերի համաձայն՝ մեղադրյալը, իբր, ստեղծել է մի քանի պիեսների սցենարներ և դրանց իրավունքները փոխանցել մշակութային հաստատությանը։
Կատարված աշխատանքի մասին հորինված հաշվետվությունների հիման վրա, տղամարդը յուրաքանչյուր հրապարակային ներկայացումից ստացել է տոմսարկղային եկամուտների 4%-ի չափով եկամուտ։
Այս սխեմայով ցուցադրվել է մի քանի տասնյակ ներկայացում։ Մոսկվայի բյուջեից գողացված գումարի չափը գերազանցել է 20 միլիոն ռուբլին», հայտնել է Իրինա Վոլկը:
Կասկածյալի բնակության վայրում խուզարկություններ են անցկացվել, որոնց ընթացքում առգրավվել են գումար, ինչպես նաև ապացուցողական արժեք ունեցող իրեր և փաստաթղթեր: Թատրոնից ևս առգրավվել են փաստաթղթեր: Աղաևի և նրա մերձավոր ազգականների հաշիվները սառեցվել են։
Նրան սպառնում է մինչև 10 տարվա ազատազրկում և մինչև 1 միլիոն ռուբլի տուգանք։
Աղաևը թատրոնում աշխատել է 1985 թվականից՝ զբաղեցնելով գլխավոր ադմինիստրատորի, տնօրենի օգնականի, փոխտնօրենի, կառավարիչ տնօրենի պաշտոնները, իսկ 1992 թվականի նոյեմբերից մինչև 2021 թվականի դեկտեմբերը եղել է Մոսկվայի ակադեմիական սատիրայի թատրոնի տնօրենը։
