Ժուռնալիստների «Ասպարեզ» ակումբի նախագահ Լևոն Բարսեղյանը, ով Գյումրու ավագանու ընտրություններին գլխավորում էր «Եվրադաշինք»-ի ցուցակը, «Ազատության» հետ զրույցում անդրադարձել է ընտրությունների
արդյունքներին, ստեղծված իրավիճակին․ «Մի շարք սցենարներ և ենթասցենարներ կան։ Որպես ենթասցենար կարող է լինել այն, որ Մարտուն Գրիգորյանն առաջարկի, որպեսզի ինքը կառավարի քաղաքը։ Արյան կոնֆլիկտ կա Մարտուն Գրիգորյանի և Վարդան Ղուկասյանի գերդաստանների միջև։ Դա բավականին ծանր բան է, որքան էլ փորձեն Սերժ Սարգսյան-Ռոբերտ Քոչարյան մակարդակով այս խնդիրը լուծել։ Երկուսին շատ լավ ճանաչում եմ, երկուսն էլ ուզում են լինել առաջնորդ»,- ասել է Բարսեղյանը՝ նշելով, որ եթե որևէ միավորում չլինի, և Սարիկ Մինասյանը դառնա քաղաքապետ, ապա նա ուղղակի 14 ավագանիներով քաղաքական գերի կընկնի, քանի որ մնացած 19-ը կլինեն իրեն ընդդիմություն։ Իսկ եթե ՔՊ-ն չառաջադրվի, հարաբերական մեծամասնությամբ Վարդան Ղուկասյանը դառնա քաղաքապետ, ապա նույն գերությունն է սպասվում, բայց նա ավելի խոցելի վիճակում կհայտնվի, քանի որ նրա վրա քրեական գործեր կան։
Ըստ Բարսեղյանի, եթե չհաջողվի քաղաքապետ ընտրել, ավագանին կլուծարվի և նոր ընտրություն կլինի։ «Շատ քիչ հավանական եմ համարում, որ Մարտուն Գրիգորյանը միանա Վարդան Ղուկասյանին։ Մի տարբերակ կա, որ նրան վերևներում ասեն՝ մնա ԱԺ պատգամավոր, և ինչ-որ բոնուսներ առաջարկեն զիջման դիմաց»,- հավելել է Բարսեղյանը։
357 դիտում , 3 դիտում այսօր
