Հայաստանում ժողովրդավարություն է, և՛ Կառավարությունը, և՛ բոլորս միասին պետք է հաշվի նստենք և հարգենք քաղաքացու քվեն: Եթե քաղաքացին որոշել է տվյալ անձին, տվյալ կուսակցությանը ձայներ ապահովել, ուրեմն պետք է հարգել և պետք է վերլուծել, բնականաբար։
Այս մասին մարտի 31-ին, ԱԺ-ում լրագրողների հետ զրույցում ասել է սոցապ նախարար Նարեկ Մկրտչյանը՝ անդրադառնալով Գյումրիում և Փարաքարում կայացած ընտրություններին:
«Առհասարակ Հայաստանում չկան ազդեցության գոտիներ, և չկան անձինք, որոնք կունենան X մարզում, X քաղաքում, գյուղում ազդեցության ինչ-որ լծակներ, հնարավորություններ: Յուրաքանչյուր արդյունքի հետ պետք է հաշվի նստել, պետք է հարգել քաղաքացիների տված քվեն, ձայնը, նրանց որոշումը և շարժվել առաջ։ Նորմալ են ընտրությունները, ընտրությունները դրա մասին են»,- ասել է նախարարը:
Նարեկ Մկրտչյանը խոսել է նաև ժողովրդի՝ ՔՊ-ի նկատմամբ ունեցած վստահության մասին՝ նշելով.
«2026 թվականի ընտրություններին մենք վստահ ենք, որ հաղթանակ ենք տանելու: Ես տեղյակ չեմ, Վիլեն Գաբրիելյանը ինչ է ասել, ես մի բան կարող եմ ասել, որ զարգացման այն ծրագրերը, որոնք մենք իրականացնում ենք, հաճախ կարծում եմ՝ մեր ամենամարտահրավերային կողմերից մեկը այն է, որ մենք այդ ծրագրերը պետք է ավելի արդյունավետ կարողանանք ներկայացնել, հաճախ նաև նույն խոշորացված բնակավայրերում, բնակավայրերի բնակիչների ոչ բոլոր ներկայացուցիչներն են տեղյակ, թե ինչ ծրագրեր կան, ինչպես են դրանք իրականացվում, ինչ զարգացում է դա ենթադրում:
Կարծում եմ այստեղ կա աշխատանքի տեղ: Սա մեր հաջողությունն է, որ մենք կարողանում ենք Հայաստանում ժողովրդավարական ընտրություններ կազմակերպել, որտեղ ձեր ասած ազդեցության գոտիները չկան, և ժողովրդի քվեն հարգվում է»:
