«Իմ ձայները բոլորից բարձր է, ես չգիտեմ աշխարհում նման բան, որ ովքեր որ շատ ձայներ են ունեցել, գնան միանան քիչ ձայներ ունեցողին: Հետո՝ և՛ Կարենը և՛ Ռուբենը, միացել են ինձ, մենք սպասում ենք իրեն՝ Մարտունին»:
Այս մասին Գյումրիում ասուլիսի ժամանակ հայտարարեց Հայաստանի կոմունիստական կուսակցության թեկնածու Վարդան Ղուկասյանը՝ արձագանքելով հարցին, թե արդյոք պատրաստվո՞ւմ է մնացած ընդդիմադիր ուժերի հետ գնալ կոալիցիայի:
Հարցին՝ միավորվելու դեպքում փոխքաղաքապետի ու վարչության պետերի պաշտոնները կտա՞ մյուս ընդդիմադիր ուժերին, թե՞ միանձնյա կկառավարեն, Ղուկասյանն ասաց՝ փոխքաղաքապետի պաշտոնը՝ ոչ, մնացած պաշտոնները պատրաստ է տալ:
Ղուկասյանը նաև նշեց՝ Մարտուն Գրիգորյանի ամբողջ ունեցվածքի տակ գրված է Վարդան Ղուկասյան:
«Ինչ սեփականություն, որ իրենք հիմա ունեն, և ոչ միայն իրենք, իրա հորեղբայրները, թաղի ժողովուրդը և մնացածը, քաղաքում ով ուզեցել է ներդրում անել, ես չեմ նայել, թե սա իմ ընդդիմությունն է, կամ չգիտեմ՝ ինչ է, բոլորին, ինչ կա այս քաղաքում, իմ տվածն է: Այսինքն՝ կարող է դաժը որևիցե մեկի հորեղբայրը լիներ քաղաքապետ, ինձ պես առատաձեռն ու սատարող չլիներ, ոնց որ ես եմ եղել բոլորի նկատմամբ, ոչ միայն Մարտունենց նկատմամբ»,- ասաց Ղուկասյանը:
Հիշեցնենք՝ Գյումրու ՏԻՄ ընտրությունների արդյունքների ամփոփմամբ պարզ է դարձել, որ որևէ քաղաքական ուժի չի հաջողվել հավաքել 50+1 տոկոս անհրաժեշտ քվեները, և նախնական վարկածով՝ առանց դաշինքներ ու կոալիցիաներ կազմելու հնարավոր չի լինելու ստանձնել քաղաքի կառավարումը:
1673 դիտում , 1 դիտում այսօր
