Գյումրիի ՏԻՄ ընտրություններում անցողիկ շեմը հաղթահարած ընդդիմադիր ուժերը, մասնավորապես՝ «Մայր Հայաստան»-ն ու «Իմ հզոր համայնքը», հայտարարել են համայնքի նախկին ղեկավար Վարդան Ղուկասյանին միանալու մասին։ Փաստորեն, Ռոբերտ Քոչարյանի և Սերժ Սարգսյանի պրոտեժեներ Կարեն Սիմոնյանն ու Ռուբեն Մխիթարյանն իրենց այս որոշմամբ ապացուցում են, որ «քաղաքականությունը պոռնկություն է» հայտնի ֆրազը ոչ միայն ճշմարիտ է, այլև՝ կենսունակ։ Ինչ է ստացվում՝ երբ սույն նորահայտ քաղգործիչները հայտարարում էին «երկիրը փրկելու», Գյումրին զարգացնելու և այլ վեհ ու պայծառ գաղափարների մասին, նկատի ունեին, որ փրկությունն ու զարգացումը բերելու են Գյումրին 13 տարի կառավարած ու կեղեքած, պետական սեփականությունը «տակով արած» ու ապօրինի հարստացած, սկանդալներից ու կրիմինալ պատմություններից աչք չբացած (տես նաև սկանդալային տեսագրությունը), ոչ նորմատիվային բառապաշարով հաղորդակցվող էքսցենտրիկ սուբյեկտի հետ։
Նախկին ռեժիմի «քաղաքական ռեինկարնացիան», փաստորեն, (եթե իհարկե, այն տեղի ունենա) տեղի է ունենալու Սերժ Սարգսյանի կողմից 2012-ին «գծերից գցված»՝ ու հետապնդված Վարդան Ղուկասյան+սերժաքոչարյանական սատելիտներ ֆորմատով։
Ի դեպ, տեղին է հիշեցնել Ռուբեն Մխիթարյանին առաջադրած «Իմ հզոր համայնք»-ի նախընտրական ծրագրի նախաբանը, որտեղ դրա հեղինակը ուղղակի թաղում է քաղաքի նախկին կառավարիչներին, ի մասնավորի նաև Ղուկասյանին, նրանց մեղադրելով թալանի ու աղետը «կթու կով» սարքելու մեջ։ և ուրեմն․ «Գյումրին աղետի գոտու վերածել են ոչ միայն երկրաշարժը և դրան հետևած ԽՍՀՄ փլուզումն ու պատերազմը, այլև բոլոր նրանք, ովքեր շահարկել են աղետն ու դրա հետևանքները։ Քաղաքական գործիչները, որոնք բնակչության արդար դժգոհությունը փորձել են ծառայեցնել իրենց նպատակներին, բարերարները, որոնք սեփական եսասիրությունը բավարարելով՝ բնակչությանը դատապարտում էին մուրացկանության, տարատեսակ չինովնիկներն ու խաբեբաները, որոնք օգնության անվան տակ զբաղված էին թալանով։ Չնայած այդքան փորձություններին՝ Գյումրին կա։ Ու կա ոչ թե նմանատիպ մարդկանց շնորհիվ, այլ ի հեճուկս նրանց արկածախնդրության։ Ի հեճուկս բոլոր նրանց, ովքեր Գյումրին ու աղետը սարքել էին կթու կով»։
Փաստորեն, նախկին նախագահների քաղաքական արբանյակները, միանալով Վարդանիկին ուզում են վերադարձնել թալանի ու արկածախնդրության ժամանակները։
