Սահմանին տեղի է ունեցել գերիների, պատանդների և անհայտ կորած անձանց հարցերով զբաղվող միջգերատեսչական հանձնաժողովների հանդիպում, ընթացքում բազմաթիվ հարցեր են քննարկվել։
Այս մասին ԱԺ-ում լրագրողների հետ ճեպազրույցի ընթացքում ասաց ԱԱԾ տնօրեն Արմեն Աբազյանը՝ անդրադառնալով հայ-ադրբեջանական սահմանին 2 երկրների՝ գերիների, անհետ կորածների հարցերով հանձնաժողովների հանդիպմանը։
«Քննարկում տեղի է ունեցել, պայմանավորվածություն է ձեռք բերվել, որ նշված աշխատանքները կշարունակվեն։ Ես հանդիպում եմ ունեցել ծնողների հետ, նրանք տեղեկացվել են այդ հանդիպման արդյունքների վերաբերյալ»,-ասաց Արմեն Աբազյանը։
Նա այլ մանրամասներ չհայտնեց, քանի որ դրանք որոշակի գաղտնիություն է պարունակում։
«Հիմա ամեն ինչ արվում է, որ հաջորդ հանդիպումը տեղի ունենա և դրա արդյունքում մեր անհետ կորածների և գերեվարվածների ծնողներն իրենց հուզող բոլոր հարցերի պատասխանը ստանան»,-նշեց նա:
Հիշեցնենք՝ 2025 թվականի փետրվարի 7-ին Հայաստանի Հանրապետության և Ադրբեջանի Հանրապետության սահմանին տեղի է ունեցել Հայաստանի Հանրապետության գերիների, պատանդների և անհայտ կորած (գտնվելու վայրն անհայտ) անձանց հարցերով զբաղվող միջգերատեսչական հանձնաժողովի և Ադրբեջանի Հանրապետության ռազմագերիների, պատանդների և անհայտ կորած քաղաքացիների հարցերով պետական հանձնաժողովի հանդիպումը:
