Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևը աշխատանքային միգրացիայի հարցերով խորհրդակցություն է անցկացրել։
Նա հիշեցրել է նախագահի պահանջը՝ մինչև տարեվերջ ընդունել միգրացիոն պետական քաղաքականության նորացված հայեցակարգ, որը կարտացոլի բոլոր անհրաժեշտ մեխանիզմներն ու գործիքները։
Մեդվեդևը հայտարարել է, որ աշխատանքային միգրանտների մեջ կարևոր է բացահայտել նրանց, ովքեր գալիս են Ռուսաստան՝ գումար վաստակելու, բայց հարկ չեն համարում վճարել հարկերը: Նրա խոսքով՝ շատերն այնտեղ ապրում են իրենց ամբողջ ընտանիքներով՝ բեռ ստեղծելով սոցիալական ոլորտի վրա։
«Աշխատող միգրանտների և նրանց գործատուների եկամուտները պետք է դուրս բերվեն ստվերից»,- ընդգծել է ԱԽ փոխնախագահը։ Նրա կարծիքով՝ օտարերկրյա քաղաքացիներին Ռուսաստանում ապրելու և եկամուտ ստանալու հնարավորություն պետք է տրվի միայն օրինական աշխատելու և բոլոր օրենքներին համապատասխանելու դեպքում։
Հանդիպմանը քննարկվել են նաև առաջարկներ ընկերությունների ղեկավարների համար անձնական պատասխանատվության վերաբերյալ, ովքեր աշխատանքի են ընդունում միգրանտներին կեղևային ընկերությունների միջոցով և ստվերային սխեմաներ են օգտագործում աշխատաշուկայում: VKontakte սոցիալական ցանցում Մեդվեդևը մեջբերել է ՆԳՆ-ի տվյալները, որոնց համաձայն՝ տարեկան հայտնաբերվում և դադարեցվում է մոտ 80 հազար խախտում՝ կապված անօրինական ներգաղթյալների աշխատանքի ընդունվելու հետ։
Համապատասխան գերատեսչությունները պետք է միասին աշխատեն՝ անօրինական ներգաղթյալների և անբարեխիղճ գործատուների համար բացերը վերացնելու համար, կարծում է Անվտանգության խորհրդի փոխնախագահը։
