ՀՀ էկոնոմիկայի նախարար Գևորգ Պապոյանը մարտի 6-ին հանդիպել է Մանթաշյանց գործարարների միության անդամների հետ։
Ինչպես հայտնում են նախարարությունից, հանդիպման ընթացքում միության անդամները բարձրացրել են իրենց հուզող հարցերը, որոնք վերաբերել են տնտեսության տարբեր ոլորտների խնդիրներին։
Մասնավորապես՝ անդրադարձ է կատարվել արտադրանքի արտահանման և ներմուծման ընթացակարգերին, առանց մաքսատուրքի էլեկտրոմոբիլների ներմուծմանը, լոգիստիկ հնարավորությունների և կապիտալի շուկայի զարգացմանը, արտասահմանյան շուկաներում հայկական արտադրանքի ճանաչելիության բարձրացմանն ու առաջմղմանը և այդ համատեքստում միջազգային հեղինակավոր ցուցահանդեսներին հայ արտադրողների մասնակցությանը։
Նախարարը ներկայացրել է ՀՀ տնտեսության ոլորտում իրականացվող պետական քաղաքականությունը և աջակցության ողջ գործիքակազմը, որից հետո պատասխանել է հարցերի, լսել գործարարների բարձրաձայնած խնդիրներն ու առաջարկները հնարավոր լուծումների վերաբերյալ։
