«Մենք շահագրգիռ ենք, թող որևիցե մեկի մոտ կասկած չլինի, որ որևիցե մի ռազմագերի, մի մարդ, որը հիմա Բաքվի դատարանում այդ ձևական դատավարության ընթացքում ամբաստանյալ է հանդիսանում, մեզ համար համարվում է անցանկալի անձ և մենք չենք զբաղվում այդ հարցով»,- լրագրողների հետ ճեպազրույցում ասաց ԱԺ նախագահ Ալեն Սիմոնյանը:
Սիմոնյանը շեշտեց, որ նրանք մեր հայրենակիցներն են և իրենց վերադարձի հետ կապված բոլոր քայլերն արվել են և արվելու են. «Հիմա այդ դատավարության աղմուկը բարձր է և բոլորը շուտափույթ որոշումներ և լուծումներ են ուզում, հաշվի առնելով, թե ովքեր են դատավարություն իրականացնում և ինչու է դա արվում, կարծում եմ, որ այս փուլում շատ դժվար է լինելու, բայց դա չի նշանակում, որ փորձերն ու աշխատանքներն այդ ուղղությամբ չեն շարունակվի: Ոնց եք պատկերացնում հիմա մենք բանակցություն վարենք, դատարանի նիստերի դահլիճից իրենց բաց թողնեն, այո, անում ենք դա, բայց չեմ հավատում, որ իրենք այդ ամենը կազմակերպել են, որ այդպես կիսատ թողնեն»:
Անդրադառնալով հնչող քննադատություններին՝ Սիմոնյանն ասաց. «Իրենք այսքան ժամանակ ինչ են արել, բացի քննադատելուց և բացի հարևան երկրի ԶԼՄ-ներին և հատուկ ծառայություններին առիթ տալուց, որպեսզի նրանք ՀՀ-ում հիբրիդային բաներ հրահրեն: Ով ասաց, որ խաղաղության պայմանագրի մեջ պետք է նման կետ լիներ, իսկ ով ասաց, որ օրինակ, եթե Ադրբեջանը նոյեմբերի 9-ի հայտարարությունը, որտեղ ասվում է, որ բոլոր պահվող անձինք պետք է վերադարձվեն, ինքն այդ կետը չի արել, հիմա մենք պետք է գանք ևս մի փաստաթղթի մեջ դնենք և ինքն այդ կետն անի: Ադրբեջանն այդ «լծակ»-ն օգտագործել է և շարունակելու է օգտագործել՝ քաղաքական առևտուր անելու համար, ինչն արվեց COP29-ի ժամանակ»:
