Չնայած Գյումրու համայնքապետի թեկնածուների շատ անուններ են շրջանառվում, մինչ օրս ոչ մի քաղաքական ուժ թիվ 31 Ընտրատարածքային ընտրական հանձնաժողով արտահերթ ընտրություններին մասնակցելու փաստաթղթային փաթեթ չի ներկայացրել:
«Հայկական ժամանակ»-ի հետ զրույցում ԸԸՀ նախագահ Տիգրան Ղազարյանն ասաց՝ նման իրավիճակ նաև նախորդ ընտրության ժամանակ է եղել. նախավերջին և վերջին օրն են հիմնականում տարվում դիմումները:
«Մինչև մարտի 5-ը՝ ժամը 18:00-ը, պետք է դիմումները ներկայացնեն, գրանցումը մինչև մարտի 10-ն է: Վերջին 2-3 օրն են բերում, եղել է, որ վերջին օրը՝ ժամը 17:00-ին են բերել: Դրա համար չենք անհանգստանում, որովհետև էսպես շուտ չեն էլ բերել ոչ մի անգամ: Նախորդ ընտրություններին էլի նույն պատկերն էր»,- ասաց Ղազարյանը:
Մինչև մարտի 5-ը փաթեթները կընդունվեն, իսկ գրանցումների վերջնաժամկետը մարտի 10-ն է: Ղազարյանի խոսքով՝ ինչքան շուտ ներկայանան, այնքան իրենց ծանրաբեռնվածությունը կնվազի:
«Ես բոլորին, ում որ գիտեմ, որ թեկնածուներ են լինելու, տեղեկացրել եմ, որ ինչքան շուտ բերեն, մեր գործը կթեթևանա, բայց օրենքի հետ խնդիր չկա: Կարող են նույնիսկ մարտի 5-ին՝ ժամը 17:59-ը, բերել, վերջնաժամկետը 18:00 է, իրենց իրավունքն է. ուզեն՝ ուշ կբերեն, ուզեն՝ շուտ կբերեն: Երբ էլ բերեն, մենք գիշերն էլ կնստենք, կստուգենք»,- նշեց ԸԸՀ նախագահը:
